11 ناۋرىزداعى جەر سىلكىنىسىنەن زارداپ شەككەن جاپونيانىڭ «فۋكۋسيما-1» اەس-ءىنىڭ ءتورتىنشى ەنەرگوبلوگىندا تاعى دا كۇشتى جارىلىس بولدى.
اەس-ءتىڭ وپەراتورى بولىپ تابىلاتىن تەرسو كومپانياسىنىڭ مالىمەتتەرى بويىنشا, جارىلىس راديواكتيۆتى قالدىقتاردى جيناۋمەن اينالىسىپ جاتقان قاشىقتىقتان باسقارىلاتىن بۋلدوزەردىڭ جانىندا بولعان. ماماندار ماشينە جەرگە كومىلگەن گاز باللونىنا سوعىلعان دەگەن جورامال ايتىپ وتىر. جارىلىس ستانسا اۋماعىنا ەشقانداي زارداپ اكەلمەگەن كورىنەدى.
كاددافيدىڭ تاعدىرى نە بولماق؟
مۋامار كاددافي ەلدەن كەتە مە, ءالدە جوق پا دەگەن ساۋال توڭىرەگىندەگى ءاڭگىمە سوڭعى كەزدەرى بارىنشا ءورشىپ تۇر.
ليۆيا باسشىسى ءوزىنىڭ ەلدەن كەتۋى تۋرالى ماسەلەنى تالقىلاۋعا دايىن دەگەن سىبىس حالىقارالىق كواليتسيانىڭ ەلدىڭ بىرقاتار نىساندارىنا, سونىڭ ىشىندە كاددافيدىڭ رەزيدەنتسياسىنا دا اۋەدەن سوققى جاساۋى اياسىندا تۋىنداپ وتىر. ەكىنشى جاعىنان, قالاي دەگەندە دە مەملەكەت باسشىسىنىڭ كوزىن جويۋ – الەم قاۋىمداستىعى, اسىرەسە, اراب الەمى كوزقاراسى تۇرعىسىنان العاندا ناق ءبىر جاقسى جاعداي ەمەس. برازيليا, رەسەي, ءۇندىستان, قىتاي جانە وڭتۇستىك افريكا ءتارىزدى بريكس ەلدەرى دە ناتو-نىڭ الەمدىك ءتارتىپ ساقشىسى بولۋ يدەياسىن قولداپ وتىرعان جوق.
گەرمانيادا ەنەرگيا تاپشىلىعى تۋىنداي ما؟
اتوم ەلەكتر ستانسالارىنان باس تارتۋىنا بايلانىستى گەرمانياعا نە ەنەرگيا تۇتىنۋدى قىسقارتۋعا, نە رەسەي ەنەرگيا كوزدەرىنە دەگەن تاۋەلدىلىكتى ارتتىرۋعا تۋرا كەلەدى.
اتوم ەنەرگەتيكاسى جونىندەگى ساراپشى, Atominfo جوباسىنىڭ جەتەكشىسى الەكساندر ۋۆاروۆ گەرمانيادا قالىپتاسقان جاعدايعا بايلانىستى وسىنداي پىكىر ءبىلدىرىپ وتىر. ويتكەنى, اەس-تەر وندىرەتىن ەلەكتر قۋاتتارىنىڭ 20 پايىزدان استامىن بالامالى ەنەرگيا كوزدەرى كومەگىمەن الماستىرۋ وتە قيىن. رەسەيلىك ساراپشىنىڭ ايتۋىنشا, تاعى ءبىر نۇسقا بار. ول بالتىق اەس-ءى ىسكە قوسىلعاننان كەيىن گەرمانيانىڭ ەلەكتر قۋاتتارىن وسى ستانسادان ساتىپ الۋ مۇمكىندىگى.
يران كانتسلەر ۇشاعىن وتكىزبەي قويدى
يران ۇكىمەتى گەرمانيا كانتسلەرى انگەلا مەركەل وتىرعان ۇشاقتىڭ ءوز اۋماعى ارقىلى ۇشىپ وتۋىنە رۇقسات بەرمەي قويعان.
MIGnews اگەنتتىگىنىڭ حابارلاۋىنشا, ۇشاق بىرنەشە ساعات بويى تۇركيانىڭ ءۇستىندە ۇشىپ جۇرگەن. ۇشقىشتار جانارماي جەتپەي قالۋىنان قاۋىپتەنىپ تۇركياعا قونباق بولعان كەزدە عانا اقىرى رۇقسات بەرىلگەن. گفر كانتسلەرى وتىرعان ۇشاق تۇركيادان ءۇندىستانعا بارا جاتقان كورىنەدى. نەمىس باسپاسوزى يران وسى ارقىلى گەرمانيانى يراننىڭ يادرولىق باعدارلاماسىنا قارسى سانكتسياعا قاتىسقانى ءۇشىن جازالاماق بولدى دەگەندى ايتىپ وتىر.
بەيبىت حالىقتى اتۋعا جول بەرىلمەيدى
اۋعانستان پرەزيدەنتى حاميد كارزاي بۇدان بىلاي ناتو-نىڭ بەيبىت تۇرعىنداردىڭ ۇيلەرىنە اۆياسوققى جاساۋىنا جول بەرمەيتىنىن مالىمدەدى.
مەملەكەت باسشىسى مۇنداي مالىمدەمەنى 28 مامىر كۇنى ناتو اسكەرلەرىنىڭ اۋەدەن سوققى بەرۋ ارقىلى ەلدىڭ ءوڭتۇستىگىندەگى حەلماند پروۆينتسياسىندا بىرنەشە ايەل مەن بالالاردى ولتىرۋىنەن كەيىن جاساپ وتىر. ناتو-نىڭ رەسمي وكىلى سانسەت بەلينسكي ح.كارزايدىڭ مالىمدەمەسىنەن كەيىن ناتو-نىڭ ءوز ستراتەگياسىن قايتا قارايتىنىن حابارلاعان. بىراق ول ءوز تاكتيكاسىنىڭ تەز ارادا وزگەرە قوياتىندىعى تۋرالى ەشتەڭە ايتپاعان. جالپى, سوڭعى كەزدەرى بەيبىت تۇرعىنداردىڭ وققا ۇشۋى تىم جيىلەپ بارادى.
وتانىن ساتتى دەپ ايىپتاماق
«ءبىرتۇتاس گرۋزيا دەموكراتيالىق قوزعالىسىنىڭ» جەتەكشىسى نينو بۋردجانادزە گرۋزيا پرەزيدەنتى ميحايل سااكاشۆيليگە, ىشكى ىستەر ءمينيسترى ۆانو مەرابيشليگە جانە باسقا دا بىرقاتار شەنەۋنىكتەرگە «سالدىر-سالاقتىق نەمەسە وتاندى ساتتى» دەگەن ايىپتار تاقپاق.
مۇنداي جاعداي گرۋزيا ىشكى ىستەر مينيسترلىگىنىڭ قارۋلى توپقا قاتىستى دەگەن كۇدىكپەن كينتسۆيسي موناستىرىندا 24 ادام ۇستالدى دەگەن مالىمدەمەسىنەن كەيىن ورىن الىپ وتىر. ءىىم-ءنىڭ مالىمەتىنە سايكەس, توپقا بۇگىندە رەسەيدە تۇراتىن, گرۋزيانىڭ بۇرىنعى ىشكى ىستەر ءمينيسترى تەمۋر حاچيشۆيلي جەتەكشىلىك ەتكەن. بۋردجانادزەنىڭ ايتۋىنشا, گرۋزيا بيلىگى وسىنداي اقپاراتتى ۇستانا وتىرىپ, ەلدىڭ تاۋەلسىزدىگى مەن ەگەمەندىگىنە قاۋىپ ءتوندىرىپ وتىر.
ۇندىستانداعى اۆتوبۋس اپاتى
ءۇندىستاننىڭ سولتۇستىك-شىعىسىندا ورنالاسقان اسسام شتاتىندا اۆتوبۋس سۋعا كەتىپ قالعان.
ونىڭ سالونىندا ۇيلەنۋ تويىنا بارا جاتقان قوناقتار بولعان ەكەن. قاراڭعى كەشتە ورىن العان اپات سالدارىنان كەم دەگەندە 37 ادام قازا تاپقان كورىنەدى. كۋاگەرلەردىڭ ايتۋىنشا, قايعىلى جاعدايدىڭ ورىن الۋىنا تاۋلىكتىڭ قاراڭعى مەزگىلىندە جولدىڭ بۇرالاڭ ەكەنىن ەسكەرتەتىن جول بەلگىسىن بايقاماي قالعان جۇرگىزۋشى كىنالى. جەرگىلىكتى تۇرعىنداردىڭ كۇش-جىگەرىنىڭ ارقاسىندا اۆتوبۋس ىشىندە ءتىرى قالعان 6 ادامدى قۇتقارىپ قالۋدىڭ ءساتى ءتۇسىپتى.
قياردان تۋعان قاربالاس
ەۋروپادا «قيار» دۇربەلەڭى بارعان سايىن قارقىن الا تۇسۋدە.
وقيعا گەرمانيادا اسقازان-ىشەك ينفەكتسياسىنىڭ بۇرق ەتە قالۋىنا بايلانىستى باستالىپ وتىر. يسپانيادان اكەلىنگەن قياردى تاماققا پايدالانۋ سالدارىنان ەلدە 10 ادام قايتىس بولىپ, 1200 ادام اۋىر ناۋقاس بەلگىلەرىمەن اۋرۋحانالارعا تۇسكەن كورىنەدى. سوعان وراي رەسەيدىڭ ەۋروپامەن شەكارالاس وڭىرلەرىندە دە قاۋىپسىزدىك شارالارى قولعا الىنۋدا. اتاپ ايتقاندا, 30 مامىردان باستاپ رەسەي يسپانيا مەن گەرمانيادان كوكونىس اكەلۋگە تىيىم سالىپ وتىر.
ينتەرنەت ماتەريالدارى نەگىزىندە ازىرلەندى.