ءتورت كۇندى قامتىعان تمد, ەۋرازەق پارلامەنتارالىق اسسامبلەيالارىنىڭ جانە ۇقشۇ پارلامەنتتىك اسسامبلەياسىنىڭ جوسپارلانعان ءىس-شارالارى وتكەن سەيسەنبى كۇنى سانكت-پەتەربۋرگتە نەۆا حالىقارالىق ەكولوگيالىق كونگرەسىمەن قورىتىندىلاندى. گازەتتىڭ وتكەن نومىرلەرىندە حابارلانعانىنداي, وسى شارالاردىڭ بارلىعىنا قازاقستان رەسپۋبليكاسى پارلامەنتى ءماجىلىسىنىڭ توراعاسى ورال مۇحامەدجانوۆ باستاعان قازاقستاندىق دەپۋتاتتار دا بەلسەنە قاتىستى. حالىقارالىق مارتەبەگە يە بۇل فورۋم وسىمەن ءتورتىنشى رەت ءوتىپ وتىر. ال بيىلعى باسقوسۋدىڭ ەڭ باستى ەرەكشەلىگى, تمد-نىڭ 20 جىلدىعىنا ارنالعاندىعىندا جاتىر.
«الەۋمەتتىك-ەكولوگيالىق سالالاردى دامىتۋدىڭ يننوۆاتسيالىق مەحانيزمدەرى» تاقىرىبىنداعى حالىقارالىق ەكولوگيالىق كونگرەسس جۇمىسىنا 25-تەن استام الىس-جاقىن شەت ەلدەردىڭ, سونداي-اق ءبىرقاتار حالىقارالىق ۇيىمدار مەن ۇكىمەتتىك ەمەس ۇيىمداردىڭ وكىلدەرى قاتىستى. وندا العاشقىلاردىڭ ءبىرى بولىپ قر قورشاعان ورتانى قورعاۋ ءمينيسترى نۇرعالي ءاشىموۆ ءسوز سويلەدى. مينيستر ەلباسى نۇرسۇلتان نازارباەۆتىڭ «قازىر دامىتا بەرەيىك, ال ەكولوگيامەن سودان كەيىن اينالىسامىز – فورمۋلاسى بويىنشا بۇگىن بىردە-ءبىر ەل ءومىر سۇرە المايدى» دەگەن ءسوزىن كەلتىرە وتىرىپ, ەكولوگيانى ساۋىقتىرۋعا بايلانىستى ەلىمىز تاراپىنان قولعا الىنىپ جاتقان جۇمىستارعا توقتالدى.
«العا قويىلعان مىندەتتەردى شەشۋ ءۇشىن قازاقستان ۇكىمەتى «جاسىل ەل» باعدارلاماسىن ءازىرلەدى جانە بەكىتتى, – دەدى نۇرعالي ءاشىموۆ وسى تۋرالى. – باعدارلامانىڭ باسىمدىقتارى رەتىندە گازدىڭ اۋاعا تارالۋىن ازايتۋ, تۇتىنىلعان جانە وندىرىستىك قالدىقتار پروبلەماسىن شەشۋ, سۋ رەسۋرستارىن قورعاۋ, قورشاعان ورتاعا زيان كەلتىرگەنى ءۇشىن سالىنعان ايىپپۇلدى ەكولوگيانى ساۋىقتىرۋعا جۇمساۋ قاراستىرىلعان». ءمينيستردىڭ اتاپ ءوتكەنىندەي, استانانىڭ «جاسىل كوپىر» باستاماسى وسى جىلدىڭ مامىرىنداعى IV استانالىق ەكونوميكالىق فورۋمىنا قاتىسۋشىلاردان ءبىراۋىزدان قولداۋ تاپتى. سونداي-اق, ول كونگرەسكە قاتىسۋشىلاردى ۇستىمىزدەگى جىلدىڭ قىركۇيەگىندە ەلوردادا وتەتىن VIII پان-ەۋروپالىق قورشاعان ورتانى قورعاۋ مينيسترلەرىنىڭ كونفەرەنتسياسىنا شاقىردى.
جيىننىڭ پلەنارلىق وتىرىسىندا پارلامەنت ءماجىلىسىنىڭ ەكولوگيا جانە تابيعات پايدالانۋ جونىندەگى كوميتەتىنىڭ توراعاسى ەرلان نىعماتۋلين بايانداما جاسادى. بايانداماسىندا دەپۋتات قاتىسۋشىلاردى ەلىمىزدە ەنەرگيانى ۇنەمدى پايدالانۋ بارىسىندا قابىلدانعان زاڭنامالارمەن, سونداي-اق ازىرلەنگەن «ەنەرگيا ۇنەمدەۋ تۋرالى» زاڭنىڭ جاڭا رەداكتسياسىمەن تانىستىردى. ونداعى ماقسات – ەنەرگيالىق شىعىندى ازايتۋ «وتكەن جىلى قازاقستان ۇكىمەتى 2020 جىلعا دەيىن تۇرعىن ءۇي-كوممۋنالدىق شارۋاشىلىعىن جاڭارتۋ ءجونىندەگى باعدارلامالىق قۇجات قابىلدادى, – دەدى ەرلان نىعماتۋلين. – بۇل قۇجاتتا جىلۋدىڭ شىعىنىن تومەندەتۋ ءۇشىن تۇرعىن ۇيلەردى قاجەتتى قۇرىلعىلارمەن جابدىقتاۋ, ەنەرگيا كوزدەرىن قايتا جوندەۋدەن وتكىزۋ, باسقا دا ماسەلەلەر قاراستىرىلعان».
پارلامەنتارالىق ىنتىماقتاستىقتى تەرەڭدەتۋدى ماقسات ەتكەن سانكت-پەتەربۋرگتەگى القالى جيىن تابىستى اياقتالدى. الداعى ۋاقىتتىڭ جوسپارى بەلگىلەندى. وسىلايشا, پارلامەنتتىك ديپلوماتيا, شىن مانىندە, حالىقتىق ديپلوماتيا ەكەندىگىن كورسەتتى.