ليۋدميلا راسپوپوۆانىڭ توقىما قۋىرشاقتارى قوستاناي وڭىرىندەگى مۇگەدەك بالالار مەن ولاردىڭ اتا-اناسىنا ءبىرشاما تانىس كورىنەدى. ونى بالالار قولىنا كيىپ الىپ وينايدى. ءوزى كوپ جىلدار الەۋمەتتىك سالادا قىزمەت ىستەگەن ل.راسپوپوۆا ۇيدە وتىرىپ قالعان بالالارعا قۋىرشاق توقۋدى ادەتكە اينالدىرىپ, ۋاقىت وتە ول ءوزىنىڭ سۇيىكتى ىسىنە اينالعان. ال رىسكۇل ءابىلوۆا «تيلدا» دەپ اتالاتىن قۋىرشاقتار سەرياسىن قولدان تىگىپ جاسايدى. ءوزى تىگىنشى, ۋنيۆەرسيتەتتە قول ەڭبەگىنەن ساباق بەرەتىن ر.ءابىلوۆا قۋىرشاق تىگۋدى ستۋدەنتتەرگە, ىنتا بىلدىرگەندەردىڭ بارلىعىنا ۇيرەتۋمەن كەلەدى.
– كەشكە جۇمىستان كەلگەن سوڭ قۋىرشاق تىگۋ – مەنىڭ ەڭ سۇيىكتى ەرمەگىم. قازىر قول ەڭبەگىنىڭ قايسىسى بولسا دا جۇرتشىلىقتىڭ قىزىعۋشىلىعىن تۋدىرادى جانە تەز ساۋدالانادى, – دەيدى ر.ءابىلوۆا. ولگا زوتوۆا كوپ جىلدان بەرى تابيعي اسىل تاستاردان ايەلدەردىڭ مونشاق, سىرعا, القاسىن جاساۋمەن اينالىسادى. تازا تابيعي لاعىل, اقىق تاستاردى ءوڭدەۋ, ءبىر بەينەگە كەلتىرۋ ءايەل ادامعا وڭاي دا شارۋا ەمەس. ول جاساعان اشەكەيلەرگە سۇرانىس كوپ.
ال قارلىعاش ءجۇسىپبەكوۆانىڭ سۇيىكتى ءىسى الدىمەن كورەرمەندى تاڭعالدىرادى. ول كادىمگى سومكەنىڭ, كۇرتكەلەردىڭ سىدىرماعىنان ايەلدەردىڭ اشەكەي زاتتارىن جاسايدى. كوزدىڭ جاۋىن الاتىن سىرعا مەن القانى, جۇزىكتى سىدىرماقتان جاسادى دەگەنگە سەنەرىڭدى دە, سەنبەسىڭدى دە بىلمەيسىڭ.
– وسى ىسپەن اينالىسقانىما ءبىر جارىم جىلداي ۋاقىت بولدى. قايدان ۇيرەنگەنىمدى ايتايىن – ينتەرنەتتەن! جۇمىستان قولىم بوساسا سىدىرماقتان ءبىر بۇيىم جاساپ شىعارۋعا تىرىسامىن. قازىر جاساعان بۇيىمدارىمنىڭ سانى ءۇش ءجۇزگە دەيىن بارادى, بىراق كوبىن دوستارىما, تۋىستارىما سىيلادىم. قالعانىن ساتتىم, سۇرانىس بەرۋشىلەر دە جەتەدى, – دەيدى ق.جۇسىپبەكوۆا. سونداي-اق, اناستاسيا شۋرۋپوۆا كادىمگى سابىن جاساۋمەن اينالىسادى.
ايتسە دە, قولونەرمەن اينالىسۋ وڭاي دا, ارزان دا شارۋا ەمەس كورىنەدى. مىسالى, ا.شۋرۋپوۆا سابىننىڭ ماتەريالىن, فورماسىن رەسەيدەن, ءتىپتى ەۋروپادان الدىرادى. ارينە, ارزان ەمەس. ال رىسكۇل ءابىلوۆانىڭ قۋىرشاق تىگەتىن ماتا الۋ ءۇشىن رەسەيدىڭ چەليابى, ەكاتەرينبۋرگ قالالارىنا جول ءجۇرىپ كەتەتىن كەزدەرى از بولمايدى. ەلەنا كورياكينا قۋىرشاقتارىن قويدىڭ جۇنىنەن جاسايدى. ول ءۇشىن الدىمەن ءجۇندى وڭدەپ, كيىز باسىپ, ونى قۋىرشاق كەيپىنە كەلتىرەدى. ءبىر قۋىرشاققا ءۇش كۇندەي ۋاقىتى كەتەدى ەكەن.
قولونەرشىلەردىڭ قايسىسىمەن سويلەسسەڭ دە, سۇيىكتى ىسىنە تەك ەڭبەگىن عانا ەمەس, جان شۋاعىن توگەتىنىن ايتادى. سونىمەن قاتار, شىعارماشىلىقتا ادام قيالىنىڭ شەگى بولمايدى. كادىمگى شىنى شولمەكتەردەن جاسالعان سۇلۋ ۆازالار دا – وسى قولونەرشىلەر قيالىنىڭ جەمىسى.
– كورمەگە قاتىسقان شەبەرلەر ءوزىنىڭ سۇيىكتى قولونەرىنسىز ءومىرىن ەلەستەتە المايدى. قولدان جاسالعان, تىككەن, توقىلعان بۇيىمدار قازىر ەرەكشە باعالانادى. ولاردىڭ الەۋمەتتىك جەلىلەردە ارنايى پاراقشالارى, ءتىپتى ينتەرنەت-دۇكەندەرى دە بار, – دەيدى وبلىستىق تاريحي-ولكەتانۋ مۋزەيىنىڭ قىزمەتكەرى سالتانات قاراباەۆا.
ءنازيرا جارىمبەتوۆا,
«ەگەمەن قازاقستان»
قوستاناي