«فەيسبۋك ءححى عاسىردىڭ رەۆوليۋتسيالىق جاڭالىعى دەر ەدىم. ويتكەنى بۇعان دەيىن ادامزات تاريحىندا ميلليونداعان ادامدى ەشكىم ءبىر جەرگە جيناي العان جوق»-دەپ پۋبليتسيست, بەلگىلى قالامگەر شارحان قازىعۇل وتكەن جىلى «فەيسبۋك» الەۋمەتتىك جەلىسىندە جازعان بولاتىن. الەۋمەتتىك جەلىدە بەلسەندى قالامگەردىڭ وسى تەكتەس ەرەكشە ويلارى وقىرماندارى تاراپىنان ىلتيپاتقا بولەنىپ, كوممەنتپەن قۇپتالىپ جاتاتىنىنا دا كۋامىز. ەرەكشە ويلار مەن بولەكشە پىكىرلەردىڭ ناتيجەسى اقىرى «وڭاشاداعى ونلاين ويلار» بوپ جارىققا شىقتى. كىتاپتىڭ تۇساۋكەسەرى بەلگىلى ساتيريك كوپەن امىربەكتىڭ جۇرگىزۋىمەن ەلورداداعى ۇلتتىق اكادەميالىق كىتاپحانادا ءوتىپ, استانالىق زيالى قاۋىم وكىلدەرى قاتىناستى.
كىتاپ تۋرالى الدىمەن پىكىر بىلدىرگەن بەلگىلى قالامگەر, پارلامەنت ءماجىلىسىنىڭ دەپۋتاتى ساۋىتبەك ابدراحمانوۆ پۋبليتسيست شارحان قازىعۇلعا ءتان قاسيەت رەتىندە سىعىمداپ, ايشىقتاپ ايتۋدى ءارى توسىننان ايتۋدى اتادى. مەملەكەتتىك سىيلىقتىڭ يەگەرى, جازۋشى تولەن ابدىك جۋرناليستيكانى جاۋىنگەر جانر دەپ باعالاپ, شىندىق ءۇشىن شىرقىراپ ءجۇرىپ جىل سايىن قانشاما ءجۋرناليستىڭ كىسى قولىنان قازا تاباتىنىن مىسالعا كەلتىردى. ويتكەنى ءجۋرناليستىڭ ميسسياسى – قوعامدىق ويعا قوزعاۋ سالۋ. بۇل تۇرعىدان العاندا جازۋشى «وڭاشاداعى ونلاين ويلاردىڭ» الەۋمەتكە قاجەتتىلىگىنە, قوعامدىق ويعا قوزعاۋ سالاتىن قۋاتتىلىعىنا باسا نازار اۋداردى. «ءوزىنىڭ ىشكى الەمىن اشىپ تاستاۋ – ەرلىك. ول كەز كەلگەننىڭ قولىنان كەلە بەرمەيدى. كىتاپتىڭ ىشىندە وتە قۇندى ويلار بار. ونى ارى قاراي دامىتۋ كەرەك», – دەدى ت.ابدىك.
«وڭاشاداعى ونلاين ويلاردىڭ» تۇساۋكەسەرىندە اكىم تارازي, عادىلبەك شالاحمەتوۆ, جولتاي ءالماش ۇلى, ديحان قامزابەك ۇلى, قاينار ولجاي سىندى زيالى قاۋىم وكىلدەرى ءوز پىكىرلەرىن ورتاعا سالدى. ءبىرى ءبىلىم-عىلىمعا قاتىستى تۇستارىن, ءبىرى ادەبي ويلارى مەن ادەبي ورالىمدارىن, ءبىرى پالساپاعا باستايتىن تۇستارىن پىكىرلەرىنە وزەك ەتىپ, جالپى العاندا پۋبليتسيست, قالامگەر شارحان قازىعۇلدىڭ جازۋ مانەرى مەن ويلاۋ جۇيەسىنىڭ ەرەكشەلىگىنە ءمان بەردى. وسى جەردە جازۋشى جولتاي ءالماش ۇلىنىڭ «وقىرمانداردى سىنايتىن كىتاپ بولادى. وقىرمانداردى ويلاندىراتىن كىتاپ بولادى. شارحاننىڭ كىتابىن وقىرمانداردى سىنايتىن ءارى ويلاندىراتىن كىتاپ دەپ قاراستىرۋ كەرەك» دەگەنى كوپشىلىك كوڭىلىنەن شىققانداي. شىنىندا ءبىز كوبىنە كىتاپ تۋرالى, جازۋشى تۋرالى مولىنان ايتامىز دا, وقىرمانداردى ۇمىتىپ كەتىپ جاتاتىنىمىز بار.
«وڭاشاداعى ونلاين ويلار» جانرى انىقتالماعان, اۆتور ءوز اتىنان, ياعني ءبىرىنشى جاقتان جازىلعان ەمىن-ەركىن وي-پىكىرلەردىڭ جيىنتىعى. مۇندا شىنايى ءومىردىڭ بارلىق قىزىعى مەن شىجىعى, جاھاندىق پروبلەمالاردان باستاپ قازاقتىڭ قازىرگى تىنىس-تىرشىلىگىنە دەيىنگى ارالىقتاعى كوپتەگەن ماسەلەلەر, قۇندىلىقتار, تانىم-نانىمدار قالامگەردىڭ جۇرەك سۇزگىسىنەن ءوتىپ, كوركەم تىلمەن كەستەلەنگەن.
ايگۇل سەيىلوۆا, «ەگەمەن قازاقستان»