اقمولا وبلىسى بۇلاندى اۋدانىندا يندۋستريالاندىرۋ كارتاسى شەڭبەرىندە ەلىمىزدەگى جانە ورتالىق ازياداعى ەڭ ءىرى قۇس فابريكاسىنىڭ قۇرىلىسى جۇرگىزىلۋدە. بۇگىن ايماق باسشىسى سەرگەي كۋلاگين اۋدانعا جۇمىس ساپارى بارىسىندا اتالعان نىساننىڭ قۇرىلىسىمەن تانىستى, دەپ حابارلايدى وبلىس اكىمدىگىنىڭ ءباسپاسوز قىزمەتى.
«ماكينسك قۇس فابريكاسى» سەرىكتەستىگىنىڭ ديرەكتورى الەكسەي شەۆچەنكونىڭ ايتۋىنشا, بولاشاق قۇس فابريكاسى 2015-2019 جىلدار ارالىعىندا ەكى كەزەڭمەن سالىنىپ بىتپەك. جوباعا قۇيىلاتىن ينۆەستيتسيانىڭ كولەمى 39 ميلليارد تەڭگە شاماسىندا.
جوبانى جۇزەگە اسىرۋ بارىسىندا «قازاقستان رەسپۋبليكاسىنىڭ 2015-2019 جىلدارعا ارنالعان يندۋستريالىق-يننوۆاتسيالىق دامۋ باعدارلاماسى», «بيزنەستىڭ جول كارتاسى-2020» جانە «اگروبيزنەس-2020» ءتارىزدى مەملەكەتتىك باعدارلامالارعا قاتىسۋ كوزدەلىپ وتىر. قۇس فابريكاسىن سالۋ جاڭادان تۇراقتى 700 جۇمىس ورنىنىڭ اشىلۋىنا مۇمكىندىك بەرەدى. سونداي-اق, بۇلاندى اۋدانىنىڭ قۋات كوزدەرىمەن جانە سۋمەن جابدىقتالۋ جۇيەسىن نىعايتادى, وڭىردەگى شاعىن جانە ورتا بيزنەستىڭ دامۋىنا سەپتىگىن تيگىزەدى دەپ بولجانىپ وتىر. جوبا جەلىلىك قۇرىلىس كەستەسىنە ساي, الدىمەن ينكۋباتور پايدالانۋعا بەرىلىپ, ارقايسىسىندا 6 تاۋىقحانانى بىرىكتىرەتىن 8 الاڭقاي, قۇس ەتىن ءارى قالدىقتاردى وڭدەۋ زاۋىتى مەن ءبولىمى, ەكولوگيالىق جانە تەحنولوگيالىق قوندىرعىلاردى ورناتۋ ىسكە اسىرىلادى. قازىرگى كەزدە نىسانىڭ ىرگەتاسى قالانىپ, ينجەنەرلىك كوممۋنيكاتسيا جۇيەلەرى تارتىلۋدا.
«ءبىز برويلەر وسىرۋمەن جانە قۇس ەتىن تەرەڭ وڭدەۋمەن اينالىساتىن بولامىز. جوبا بويىنشا كاسىپورىن جىلىنا 60 مىڭ توننا قۇس ەتىن وڭدەيتىن ەلىمىزدەگى ەڭ ءىرى قۇس فابريكاسىنا اينالۋى ءتيىس», - دەيدى الەكسەي شەۆچەنكو. قۇرىلىس الاڭىندا بولعان وبلىس اكىمى ماڭىزدى جوبانى جۇزەگە اسىرۋ وڭىردە جاڭا جۇمىس ورىندارىن اشىپ, ءوندىرىستى دامىتۋعا سەرپىن بەرەتىنىن ەرەكشە اتاپ ءوتتى. سونىمەن قاتار, اتالعان قۇرىلىسقا كەزەڭ-كەزەڭىمەن بولىنەتىن قارجىنى مەرزىمىندە تولىق يگەرۋ ماسەلەسى دە ءسوز بولدى.