جىل باسىنان بەرى قىزىلوردا قالاسى, سىرداريا جانە جالاعاش اۋداندارى تۇسىنداعى سىرداريا وزەنىنىڭ دەڭگەيى ايتارلىقتاي تومەندەدى. بۇل تۋرالى وڭىرلىك كوممۋنيكاتسيالار قىزمەتىندە وتكەن بريفينگتە قر قورشاعان ورتا جانە سۋ رەسۋرستارىن پايدالانۋدى رەتتەۋ جانە قورعاۋ جونىندەگى ارال-سىرداريا باسسەيندىك ينسپەكتسياسى باسشىسىنىڭ ورىنباسارى جۇماحان نۇرسەيىتوۆ ايتتى, دەپ حابارلادى قازاقپارات.
«وزدەرىڭىزگە بەلگىلى, وتكەن جىلى جالاعاش جانە قارماقشى اۋداندارىنىڭ تۇسىندا سۋعا قاتىستى ءبىرشاما قيىنشىلىقتار تۋىنداعان بولاتىن. اتالعان ماسەلەلەرگە قاتىستى ورىن الۋى مۇمكىن جاعدايلاردى سەيىلتۋ - سۋ قويمالارىنداعى رەزەرۆتەر ەسەبىنەن جۇرگىزىلۋدە. كەزىندە تومەنگە قاراي 1 مىڭ تەكشە مەتر سۋ جىبەرىلگەن بولسا, قازىرگى تاڭدا جىبەرىلىپ جاتقان سۋ كولەمى 700 تەكشە مەترگە دەيىن تومەندەدى. اتالعان 700 تەكشە مەتر سۋدىڭ 400 تەكشە مەترى كوكساراي سۋ قويماسىنا قۇيىلۋدا. وسىنىڭ اسەرىنەن سىرداريا وزەنىندەگى سۋ دەڭگەيى تاعى دا تومەندەيتىن بولادى. قىزىلوردا وبلىسىنىڭ توڭىرەگىنە ءتۇسىپ جاتقان سۋ كولەمىن سەكۋندىنا 300 تەكشە مەترگە دەيىن ازايتۋعا قول جەتكىزۋ - قاۋىپسىز جاعداي تۋعىزۋعا وڭ ىقپال ەتەدى», - دەدى ينسپەكتسيا باسشىسىنىڭ ورىنباسارى.
ايتا كەتەيىك, قاڭتار ايىنىڭ باسىنان بەرى قىزىلوردا قالاسى تۇسىنداعى سۋدىڭ دەڭگەيى 1 مەترگە دەيىن, سىرداريا جانە جالاعاش اۋداندارى تەرريتورياسىنداعى سۋ كولەمىنىڭ دەڭگەيى 70-80 سم دەيىن تومەندەگەن.