قر پارلامەنتىنىڭ ءماجىلىسى پلەنارلىق وتىرىس بارىسىندا «قازاقستان رەسپۋبليكاسىنىڭ ۇكىمەتى مەن ءبىلىم, عىلىم جانە مادەنيەت ماسەلەلەرى جونىندەگى بىرىككەن ۇلتتار ۇيىمى (يۋنەسكو) اراسىنداعى قازاقستان رەسپۋبليكاسىندا ورتالىق ازيا وڭىرلىك گلياتسيولوگيالىق ورتالىعىن قۇرۋ (2-سانات) تۋرالى كەلىسىمدى راتيفيكاتسيالاۋ تۋرالى» زاڭ جوباسى ءبىرىنشى وقىلىمدا ماقۇلدادى.
«كەلىسىمگە 2012 جىلى استانا قالاسىندا يۋنەسكو باس ديرەكتورىنىڭ قر-عا رەسمي ساپارى بارىسىندا قول قويىلدى. 17 مەملەكەتتىڭ ىشىنەن قازاقستاندى تاڭداۋ يۋنەسكو-نىڭ قازاقستاننىڭ گلياتسيولوگيا سالاسىنداعى جەتىستىكتەرىن مويىنداۋى بولىپ تابىلادى», - دەپ حابارلادى زاڭ جوباسىن تانىستىرعان قر ءبىلىم جانە عىلىم ءمينيسترى ەرلان ساعاديەۆ.
ءمينيستردىڭ ايتۋىنشا, بۇل ورتالىق ورتالىق ازيا ەلدەرى عالىمدارىنىڭ زەرتتەۋ بويىنشا كۇشتەرىن بىرىكتىرۋگە جانە ۇيلەستىرۋگە ارنالعان.
«قازىرگى ۋاقىتتا قر بعم گلياتسيولوگيالىق ورتالىق قۇرۋ ءۇشىن قاجەتتى بارلىق ءىس-شارالار كەشەنىن ورىندادى. قر ۇكىمەتىنىڭ كەلىسىمىنە سايكەس, ورتالىقتى قارجىلاندىرۋ ءۇشىن قاجەتتى قاراجات بولىنگەن. قازاقستان ءۇشىن وسى ورتالىقتىڭ قۇرىلۋى وتە ماڭىزدى. 2016 جىلى 95 ملن تەڭگە بولىنگەن», - دەدى ە. ساعاديەۆ.
سونىمەن قاتار مينيستر مۇنداي ورتالىقتىڭ الەمدە العاش رەت قۇرىلىپ جاتقانىن ايتتى.
«مۇنداي ورتالىق الەمدە العاش رەت قۇرىلۋدا. قۇرامى ءار 5 جىل سايىن وزگەرىپ وتىراتىن باسقارۋشىلار كەڭەسىن قۇرۋ جوسپارلانىپ وتىر. ورتالىقتىڭ باسقارۋشىلار كەڭەسىنىڭ قۇرامىنا يۋنەسكو ەكى وكىلىن جانە قر-دان 5 وكىلدى قوسۋ جوسپارلانۋدا», - دەدى مينيستر.
ونىڭ ايتۋى بويىنشا, قازاقستاننىڭ عالىمدارى 60 جىل بويى وسى سالادا زەرتتەۋلەر جۇرگىزۋدە.
«ورتالىقتىڭ قۇرىلۋى سۋ قاۋىپسىزدىگى, سونداي-اق كليماتتىڭ وزگەرۋى پروبلەمالارى بويىنشا جۇرگىزىلىپ جاتقان زەرتتەۋلەردىڭ دەڭگەيىن كوتەرۋگە مۇمكىندىك بەرەدى. گەوگرافيا ينستيتۋتىنان ورتالىقتا جۇمىس ىستەۋ ءۇشىن الدىن الا 43 مامان ىرىكتەلگەن, ولاردىڭ 52,4%-ى جاس ماماندار. ورتالىقتىڭ قۇرىلۋ كەزەڭىندە قىزمەتتىك ءۇي-جاي, جابدىق, باعدارلامالىق قامتاماسىز ەتۋ جانە تەحنيكالىق قۇرالداردى گەوگرافيا ينستيتۋتى بولەدى», - دەپ مالىمدەدى مينيستر.
اتاپ وتەيىك, ورتالىق ازيا وڭىرلىك گلياتسيولوگيا ورتالىعى (2-سانات) عىلىمي-زەرتتەۋ قىزمەتىن ۇيلەستىرۋدى نىعايتۋ جونىندەگى فۋنكتسيالار مەن مىندەتتەردى ورىندايدى, عىلىمي زەرتتەۋلەردى جۇزەگە اسىرادى, وڭىرلىك عىلىمي-زەرتتەۋ باعدارلامالارىنىڭ ازىرلەمەلەرىن كوتەرمەلەيدى.