جاڭا جىلدان باستاپ جاستار پراكتيكاسىنان وتۋگە حالىقتى جۇمىسپەن قامتۋ ورتالىعىنا جۇگەنگەن وقۋ ورىندارىنىڭ تۇلەكتەرىنە تولەنەتىن جالاقى 71 900 تەڭگە قۇرايدى, دەپ حابارلادى abctv.kz.
استانا قالاسىنىڭ حالىقتى جۇمىسپەن قامتۋ ورتالىعىنىڭ ۋاقىتشا جۇمىسقا ورنالاستىرۋ ءبولىمى باسشىسى قالامقاس كۇلشيمانوۆانىڭ ايتۋىنشا, جاستار پراكتيكاسىنا قاتىسۋشىلاردىڭ ەڭبەكاقىسى مەملەكەتتىك بيۋدجەت قاراجاتىنان سۋبسيديالانادى جانە ءبىلىم بەرۋ تۇلەكتەرىنە العاشقى تاجىريبە الۋ ءۇشىن جۇرگىزىلەدى.
جاستار پراكتيكاسى – بۇل العان ماماندىعى بويىنشا العاشقى جۇمىس تاجىريبەسىن الۋ ماقساتىمەن جۇرگىزىلەتىن وقۋ ورىندارىنىڭ تۇلەكتەرىن ۋاقىتشا جۇمىسقا ورنالاستىرۋ. وتكەن جىلى جاستار پراكتيكاسىنا 661 تۇلەك جۇمىسقا ورنالاستىرىلعان. ول كەزدە جالاقى 53 800 تەڭگەنى قۇراعان. ال بيىلعى جىلى جاستار پراكتيكاسىنىڭ جالاقىسى 71 900 تەڭگەنى قۇرادى. بارلىق الەۋمەتتىك شەگەرىمدەردى ەسكەرگەندە جاستار پراكتيكاسىنا قاتىسۋشىلار 60 684 تەڭگە الاتىن بولادى.
ايتا كەتەيىك, جاستار پراكتيكاسىنا سوڭعى ءۇش جىلدىڭ تۇلەكتەرى, جۇمىسسىز رەتىندە تىركەلگەندەر جانە ولاردىڭ جاسى 29-دان اسپاعاندار جولدانا الادى. جۇمىس بەرۋشى جۇمىسسىزدى جۇمىسقا الۋ تۋرالى شەشىم قابىلداعان جاعدايدا, جۇمىس بەرۋشى ونىمەن قازاقستان رەسپۋبليكاسىنىڭ ەڭبەك كودەكسىنە سايكەس ەڭبەك كەلىسىمشارتىنا وتىرادى. جاستار پراكتيكاسىنىڭ ۇزاقتىعى 6 ايدان اسپايدى.