پارلامەنت ءماجىلىسىنىڭ توراعاسى نۇرلان نىعماتۋليننىڭ توراعالىعىمەن پالاتانىڭ جاڭا جىلداعى العاشقى بيۋرو وتىرىسى ءوتتى, دەپ حابارلادى ءماجىلىستىڭ ءباسپاسوز قىزمەتى.
كۇن ءتارتىبىن ناقتىلاعان دەپۋتاتتار الداعى جالپى وتىرىستا جەرگىلىكتى ءوزىن ءوزى باسقارۋدى دامىتۋ ماسەلەلەرىنە قاتىستى زاڭ جوباسىن ءبىرىنشى وقىلىمدا قاراۋدى جوسپارلاپ وتىر. سونداي-اق, وسى كۇنى قازاقستان ۇكىمەتى مەن يۋنەسكو اراسىنداعى قازاقستاندا ورتالىق ازيا وڭىرلىك گلياتسيولوگيالىق ورتالىعىن قۇرۋ (2-سانات) تۋرالى كەلىسىمدى راتيفيكاتسيالاۋ تۋرالى زاڭ جوباسى قارالادى دەپ كۇتىلۋدە.
جالپى وتىرىستا «ستاندارتتاۋ تۋرالى» جانە وعان ىلەسپە زاڭ جوبالارى جۇمىسقا قابىلداناتىن بولادى.
سونىمەن بىرگە, بىرقاتار زاڭ جوبالارى بويىنشا, اتاپ ايتاتىن بولساق, حالىقارالىق قايتا قۇرۋ جانە دامۋ بانكىمەن قارىز تۋرالى كەلىسىمدى (الەۋمەتتىك مەديتسينالىق ساقتاندىرۋ جوباسى), يسلام ىنتىماقتاستىعى ۇيىمىنا مۇشە ەلدەر اراسىنداعى ەكونوميكالىق, تەحنيكالىق جانە ساۋدا ىنتىماقتاستىعى تۋرالى باس كەلىسىمدى راتيفيكاتسيالاۋ بويىنشا قورىتىندى ازىرلەۋ مەرزىمى تاعايىندالماق.
بيۋرو وتىرىسىندا, سونداي-اق, حالىقتى تەگىن مەديتسينالىق كومەكتىڭ كەپىلدىك بەرىلگەن كولەمى شەڭبەرىندە دارىلىك زاتتارمەن قامتاماسىز ەتۋ تۋرالى جانە فارماتسەۆتيكا سالاسىنىڭ جاي-كۇيى مەن دامۋى تۋرالى پارلامەنتتىك تىڭداۋ وتكىزۋ تۋرالى قاۋلى قابىلداندى.