وڭتۇستىك قازاقستان وبلىسىندا «شاتقال» باعدارلاماسى قابىلداندى. ەلىمىزدە العاش رەت قولعا الىنعان باعدارلاما اياسىندا بيىل شىمكەنت ايماعىنداعى 100 گەكتارعا جۋىق ساي-سالالاردا 5 ساياباق كەشەنى سالىنادى. بۇل تۋرالى وبلىس اكىمىنىڭ ورىنباسارى جاقىپ بوكەنباەۆ, تابيعي رەسۋرستار جانە تابيعاتتى قورعاۋ باسقارماسىنىڭ باسشىسى مۇحيت وتارشيەۆ پەن شىمكەنت قالاسى اكىمىنىڭ ورىنباسارى بەيسەنبەك جانبوسىنوۆ ايماقتىق كوممۋنيكاتسيالار قىزمەتىندە وتكەن ءباسپاسوز ءماسليحاتىندا باياندادى.
– وبلىس اكىمى جانسەيىت تۇيمەباەۆتىڭ تاپسىرماسىمەن ارنايى باعدارلاما قابىلدانىپ, وڭىردەگى تابيعي شاتقالداردا دەمالىس ورىندارىن قالىپتاستىرۋ جۇمىستارى باستالدى. ساياباق سالۋعا بوس جەرى جوق شىمكەنتتە مۇنداي ساي-سالالار مەن جاسىل بەلدەۋدىڭ جالپى كولەمى 16,8 مىڭ گەكتاردى قۇرايدى. قاراۋسىز قالعان شاتقالداردى كوگالداندىرىپ, ينفراقۇرىلىم جۇمىستارىن جۇرگىزىپ, سۋبۇرقاقتار, اياقجولدار, اشىق تەاترلاندىرىلعان ساحنالار, تاعى باسقا دا حالىققا قىزمەت كورسەتۋ ورىندارىن سالىپ, دەمالىس كەشەندەرىنە اينالدىرامىز. وسىنداي جوبالار جاساپ, جۇزەگە اسىرۋ وبلىستاعى باسقا اۋدان-قالا باسشىلارىنا مىندەتتەلدى, – دەدى وبلىس اكىمىنىڭ ورىنباسارى ج.بوكەنباەۆ.
م.وتارشيەۆتىڭ ايتۋىنشا, قالانىڭ جاسىل بەلدەۋىن قالىپتاستىرۋ ماقساتىندا 5 مىڭنان استام گەكتاردا 4 ميلليون 200 مىڭ ءتۇپ كوشەت ەگىلگەن. ونىڭ 52 مىڭى سوڭعى ءۇش ايدا وتىرعىزىلعان. وعان شاتقالداردى قوسقاندا ناۋرىز ايىنا دەيىن تاعى 100 ءتۇپتى ەگۋ جوسپاردا بار.
«وڭىرىمىزدەگى ەڭ ۇلكەن «جاسىل جەلەك» تۇقىمباعىندا تالدىڭ 40-تان استام ءتۇرى بار. بۇگىندە وندا 3,5 ميلليونعا جۋىق كوشەت وسىرىلۋدە. بۇدان باسقا ورمان شارۋاشىلىعىنىڭ جەكەلەگەن تۇقىمباقتارىنان دا كوشەت الۋعا بولادى», دەدى باسقارما باسشىسى م.وتارشيەۆ.
«شاتقال» باعدارلاماسى ءبىرىنشى كەزەڭىندە سالىناتىن 5 شاتقالدى العاشقىسىنا 2017 جىلدىڭ 14 قاڭتارىندا 1718 ءتۇپ كوشەت ەگىلىپ, «شىمسايا» دەگەن اتاۋ بەرىلدى. 25 گەكتارعا قاراعاي, ارشا, ەمەن, شاعان, تالشىن سەكىلدى بويشاڭ اعاشتار وتىرىعىزىلدى. سەنبىلىككە ستۋدەنتتەر, مەملەكەتتىك مەكەمە قىزمەتكەرلەرى مەن ورمان شارۋاشىلىعى قىزمەتكەرلەرى, جالپى سانى 600-دەن استام ادام مەن 20-دان استام تەحنيكا جۇمىلدىرىلدى.
«شىمكەنتتەگى 8 ساياباق, 30 سكۆەر, 1 دەندروساياباقتىڭ جالپى اۋماعى جاسىل جەلەكپەن قوسقاندا 300 گەكتاردى قۇرايدى. مۇنى ميلليون تۇرعىنعا شاقساڭىز, ادام باسىنا بار بولعانى 3-اق شارشى مەتردەن كەلەدى. بۇل ءبىر ادامعا ءبىر تالدان كەلەدى دەگەن ءسوز. ال سانيتارلىق تالاپتار بويىنشا قالادا ءاربىر ادامعا 16 شارشى مەتر جاسىل جەلەك بولۋ كەرەك. سوندىقتان وبلىس اكىمىنىڭ باستاماسىمەن قولعا الىنعان باعدارلاما وتە دۇرىس. بىراق قالا اۋماعىنداعى ساي-سالالاردى كوگالداندىرۋ مەمەلەكەتتىك قىزمەتكەرلەردىڭ عانا مىندەتى بولىپ سانالمايدى. وعان بارشامىز اتسالىسۋىمىز كەرەك», – دەدى قالا اكىمىنىڭ ورىنباسارى ب.جانبوسىنوۆ.
شاتقالدارداعى ساياباقتاردا مادەني كەشتەر ۇيىمداستىرىلاتىن امفيتەاترلاردان بولەك بالالار الاڭشاسى, شاحمات پەن دويبى الاڭى, ۆەلوجولدار, سپورتتىق جاتتىعۋ الاڭدارى سالىنىپ ەل يگىلىگىنە بەرىلەدى.