وقۋشىلاردى وتانشىلدىققا تاربيەلەۋ ۇلتتىق قۇندىلىقتارىمىزعا سۇيەنە وتىرىپ قالىپتاسادى دەسەك, ارتىق ەمەس. وتانسۇيگىشتىك سەزىمگە باۋلۋ تاربيەسى تەرەڭنەن تامىرىن تارتقان.
ول – حالقىمىزدىڭ سان عاسىرلىق بولمىسىنىڭ, دۇنيەتانىم-كوزقاراسىنىڭ, اقىل-ويى مەن سالت-ءداستۇر مادەنيەتىنىڭ جارقىن كورىنىسى. وسىنداي قاسيەتتەردى بويعا دارىتپاي تۇرىپ, ۇرپاقتى پاتريوت ەتىپ تاربيەلەۋ مۇمكىن ەمەس. تۋعان ەلىن, جەرىن قورعايتىن جانە وسى ماقسات جولىندا بار كۇش-جىگەرى مەن اقىل-پاراساتىن ايامايتىن جاس ۇلاندار تاربيەلەۋ بۇگىنگى كۇننىڭ باستى مىندەتى بولىپ تۇر. پاتريوتتىق سەزىم كورسەتكىشى – وقۋشىلاردىڭ ءىس-ارەكەتىنەن كورىنىپ تۇرۋى ءتيىس. سولاي قالىپتاستىرۋ – بىزگە پارىز. وسىنداي ءىس-ارەكەت بارىسىندا جاس بۋىن قورشاعان ورتا قۇندىلىقتارىنىڭ قالپىن بۇزباي ساقتاۋعا ءوز ۇلەسىن قوسادى. بۇل ءوز كەزەگىندە پاتريوتتىق سانا-سەزىمدەرىنىڭ دامۋىنا ىقپال ەتەرى انىق. اتاپ ايتقاندا, ءوز باسىنىڭ مۇددەسىن ۇلت ىسىمەن, وتان, مەملەكەت, حالىق مۇددەسىمەن ۇشتاستىرا تۇسەدى. ءبىلىم بەرۋ مەن عىلىمدى دامىتۋدىڭ 2016-2019 جىلدارعا ارنالعان مەملەكەتتىك باعدارلاماسىنىڭ نەگىزگى ماقساتى دا وسىعان جەتەلەيدى.
«ماڭگىلىك ەل» تالابىنا ساي, عىلىم مەن تەحنيكانىڭ, جالپى الەم وركەنيەتىنىڭ جاڭالىعىن ەركىن ءبىلىپ, ەركىن يگەرە, قولدانا الاتىن قازاقستان جاستارى قوعامنىڭ شىنايى تىرەگى بولارى حاق. مەكتەپ وقۋشىلارىنىڭ بويىنا «ماڭگىلىك ەل» جالپىۇلتتىق پاتريوتتىق يدەياسىنىڭ رۋحاني-ادامگەرشىلىك قۇندىلىقتارىن جانە سالاماتتى ءومىر سالتىنىڭ مادەنيەتىن قالىپتاستىرۋدى كوزدەيتىن مەكتەپتەردەگى, مەكتەپتەن تىس مەكەمەلەردەگى تاربيە قۇرالدارىنىڭ ءبىرى بالالار ۇيىمدارى مەن بىرلەستىكتەرى بولۋى كەرەك. وتانىن قۇرمەتتەيتىن جاس ۇرپاقتى قالىپتاستىرۋ ىسىندە ول ماڭىزدى ءرول اتقارارى ءسوزسىز. قازىر ەلىمىزدە جاڭاشىل «جاس ۇلان» مەن «جاس قىران» ۇيىمدارى قالىپتاسۋ ۇستىندە. ەلباسىمىزدىڭ جولداۋىندا ايتىلعانداي, پاتريوتيزم, مورال مەن پارساتتىلىق نورمالارى, ۇلتارالىق كەلىسىم مەن تولەرانتتىلىق سەكىلدى قۇندىلىقتاردى وقۋ بارىسىندا وقۋشىلاردىڭ بويلارىنا سىڭىرۋگە مۇمكىندىك بەرەدى. قازىرگى تاڭدا باتىس قازاقستان وبلىسىندا جاڭاشىلدىق پەن ادىستەمەلىك يدەيالاردى ءبىر ارناعا توعىستىرۋدىڭ ناتيجەسىندە بالالار ۇيىمدارى, وتانشىلدىققا تاربيەلەيتىن پاتريوتتىق كلۋبتار مەن جاساقتار قارقىندى دامىپ كەلەدى.
وقۋشىلاردى وتانشىلدىق سەزىمگە باۋلۋ – تاجىريبەمىزدىڭ ءبىرى, ەلباسىمىزدىڭ تاپسىرماسىمەن قۇرىلعان قازاقستاننىڭ جاس ازاماتتارىنىڭ باسىن بىرىكتىرەتىن «جاس ۇلان» بالالار مەن جاسوسپىرىمدەر ۇيىمى ءوز جۇمىسىنىڭ ناتيجەسىن بەرىپ ۇلگەردى. «جاس ۇلان» – وسكەلەڭ ۇرپاقتى جوعارى رۋحاني-ادامگەرشىلىك قۇندىلىقتار, گۋمانيستىك, تولەرانتتىلىق پەن دەموكراتيالىق ۇستانىمدارعا نەگىزدەلگەن قازاقستاندىق پاتريوتيزم رۋحىندا قالىپتاستىراتىن ۇيىم. ۇيىمنىڭ باستى ماقساتى دا وسكەلەڭ ۇرپاقتىڭ بويىندا پاتريوتتىق, ءبىلىم ارقىلى ءوزىن-ءوزى جەتىلدىرۋگە دەگەن قۇشتارلىق, بەرىكتىك, وتان تاريحىنا, قازاقستاننىڭ بۇگىنى مەن بولاشاعىنا دەگەن جاۋاپكەرشىلىكتى قالىپتاستىرۋ. وقۋشىلاردىڭ وتانعا دەگەن ەرەكشە قۇرمەتىن قالىپتاستىراتىن كوپتەگەن تاربيەلىك ءىس-شارالاردىڭ باسىن بىرىكتىرەتىن بالالار ۇيىمدارى ارقىلى جۇزەگە اسىرۋ ءوز ناتيجەسىن بەرەرى حاق.
ويتكەنى, «جاس ۇلان» بالالار مەن جاسوسپىرىمدەر ۇيىمى مۇشەلەرىنىڭ باستى ۇستانىمى – قازاقستاننىڭ مەملەكەتتىك رامىزدەرى – تۋدى جانە ەلتاڭبا مەن ءانۇراندى سىيلاۋ مەن قۇرمەتتەۋ, ءوز ەلىنىڭ پاتريوتى بولۋ, وقۋدا, قوعامدىق جۇمىستاردا, ەڭبەكتە ۇلگى كورسەتىپ الدا ءجۇرۋ, مادەنيەتتى بولۋ, سالاماتتى ءومىر سالتىن ۇستانۋ, ونى ءوز قۇرداستارى اراسىندا ناسيحاتتاۋ, ۇلكەنگە – قۇرمەت, كىشىگە ىزەت كورسەتۋ. مىنە, بويىنا وسىنداي قاسيەتتەردى جيعان جاس ورەندەرىمىز ءوز وتانىنىڭ پاتريوتى بولاتىنىنا سەنىمىمىز مول. ەلباسىمىز حالىققا جولداۋىندا «ماڭگىلىك ەل» قازاق ەلىنىڭ باستى ۇلتتىق يدەياسى دەپ اتاپ كورسەتكەنى بەلگىلى. بۇل ءۇشىن ءبىرىنشى كەزەكتە ەگەمەن ەلىمىزدىڭ ەرتەڭگى تۇتقاسىن ۇستايتىن جاس جەتكىنشەكتەردى وتانشىلدىق سەزىمگە باۋلۋدىڭ ماڭىزى جوعارى. تەك وسىنداي جاعدايدا عانا ءبىلىم بەرۋ مەن تاربيە ءىسى تولىققاندى بولا تۇسەرى انىق. ءتۇيىپ ايتقاندا, قازىرگى كۇنى ءوز ەلىن سۇيەتىن ناعىز وتانشىل ازامات تاربيەلەۋدەن اسقان بيىك تە مەرەيلى مىندەت جوق دەپ بىلەمىز.
جوسابەك ەسەنعاليەۆ,
«وركەن» قوسىمشا ءبىلىم ورتالىعىنىڭ پەداگوگ-ۇيىمداستىرۋشىسى
باتىس قازاقستان وبلىسى