مەملەكەت باسشىسى تاۋەلسىزدىكتىڭ 25 جىلدىعىنا وراي وتكەن سالتاناتتى جيىندا قيىن كەزەڭدەردە قايىسپاعان, ەلدى ۇيىستىرا ۇستاپ, جوقتان بار جاساعان, بۇگىنگى جارقىن كۇنگە جەتكىزگەن ۇلكەندەردىڭ ەرەن ەڭبەگىن جاس بۋىننىڭ ءاردايىم باعالاۋى كەرەك ەكەنىن ايرىقشا اتاپ وتكەن ەدى. جاس ۇرپاق اعا بۋىننىڭ قاجىماس قايراتى, ۇيقىسىز تۇندەرى مەن كۇلكىسىز كۇندەرى, توگىلگەن ماڭداي تەرى ارقىلى بۇگىنگى مامىراجاي كۇنگە جەتكەنىمىزدى سەزىنىپ ءوسۋى ءتيىس. سوندا عانا بارعا – قۇرمەت, ۇلكەنگە ىزەتتىلىك قالىپتاسادى.
جاسى ۇلكەندى سىيلاۋ – قازاق بالاسىنىڭ قانىندا بار قاسيەت. اۋىلىمىزداعى ەڭبەك ارداگەرلەرىن, قازىنالى قارتتاردى, كورگەنى كوپ, ايتارى بار اق جاۋلىقتى اجەلەردى, كوپ بالالى انالاردى مەكتەپ وقۋشىلارى اراسىنا ءجيى تارتامىز. ءتۇرلى تاربيە ساعاتتارىندا جاقسى ادامداردىڭ ءومىرىنەن مىسالدار كەلتىرە وتىرىپ, ول ادامنىڭ ءومىر جولى, شىڭدالۋ مەكتەبى, ەل مەن جەرگە سىڭىرگەن ەڭبەگى مەن ونىڭ ءناتيجەسى تۋرالى وقۋشىلارعا ەگجەي-تەگجەيلى ءتۇسىندىرەمىن, تانىستىرامىن. ارداگەر ەڭبەگىن ەل-جەرمەن, قوعام ءومىرىمەن بايلانىستىرا ءتۇسىندىرسەڭ, وقۋشى جۇرەگىنە جول تابۋ قيىن ەمەس – شارادان سوڭ وقۋشىلاردىڭ كەيىپكەردى كورسەم دەگەن نيەتىن اڭعاراسىڭ نەمەسە قانداي دا ءبىر ەرەكشە سەزىم, قۇرمەت-ىقىلاس بايقالادى.
جالپى, جاس ۇرپاقتى, وقۋشىلاردى ۇلكەندەردى, بارشا حالىقتى, قورشاعان ورتانى سىيلاۋعا, قۇرمەتتەۋگە تاربيەلەي ءبىلۋىمىز كەرەك. بالا جانى وتە نازىك, ونىڭ ءيىرىمدەرىنە جول تاۋىپ, قاجەتتىلىككە قاراي باعىتتاپ وتىرسا, ناتيجەگە قول جەتكىزۋگە بولادى. ول ءۇشىن مەكتەپتە تاربيە ساعاتتارىمەن بىرگە كەزدەسۋ كەشتەرى ۇيىمداستىرىلىپ, ارداگەرلەر ونەگەلى ەڭبەك جولدارى تۋرالى ءوزدەرى ايتىپ بەرەدى. وقۋشىلار سۇراق قويىپ, تاربيەلىك ءمانى زور اڭگىمەگە ارالاسادى. پىكىرسايىس پەن ءدوڭگەلەك ۇستەل ۇيىمداستىرۋ, ءوز وتباسىنداعى ۇلكەن كىسىلەرگە قالاي قۇرمەت كورسەتىپ ءجۇرگەندىگىن سۇراپ, ورتاعا سالۋ سىندى تاجىريبەلەردى قولدانىپ كەلەمىن. كەيبىر وقۋشىلار تاراپىنان وتباسىنداعى قارت اتا-اجەسىنە «باتىرلار جىرىن» نەمەسە مەرزىمدى باسپاسوز بەتتەرىندەگى تاعىلىمدى-تۇشىمدى ماتەريالداردى وقىپ بەرەتىندىگىن انىقتاپ, ونى وزگەلەرگە قولدانۋعا كەڭەس بەردىك. بۇل ءبىر جاعى, اتا-اجە ءۇشىن قاجەتتىلىك بولسا, ەكىنشىدەن, وقۋشىلاردىڭ حالقىمىزدىڭ ءتول ونەرىمەن سۋسىنداۋىنا, ءوز دۇنيەتانىمىن كەڭەيتۋىنە جانە ۇلتتىق رۋحاني قۇندىلىقتارىمىزدى قادىرلەپ, بويىنا ءسىڭىرىپ وسۋىنە زور مۇمكىندىك.
ءبىلىم ورداسىندا انالار, اجەلەر مەكتەبى جۇمىس جاسايدى. بۇل مەكتەپتەردىڭ وقۋشىلارمەن بىرگە, اۋىلداعى جاس انالارعا, قىز-كەلىنشەكتەرگە بەرەر ءتالىم-تاربيەسى مول. ءومىردەن كورگەن-تۇيگەنى كوپ, قيىن كەزدە تىعىرىقتان شىعار جول تابا بىلەتىن انالار بالا ءتاربيەسىنە, كەلىن ىزەتتىلىگىنە, ەر-ازاماتتى كۇتۋ, باعالاۋ, قوناق كۇتۋ, اعايىنمەن ارالاسۋ, حالقىمىزعا ءتان سالت-ءداستۇرلەردى ۇستانۋ, وزگە دە وتباسىلىق قۇندىلىقتارعا قاتىستى اقىل-كەڭەستەرىن ايامايدى.
مەكتەپتە ۇلكەندى سىيلاۋعا قاتىستى تاربيەنىڭ جولى دا, ءمۇمكىندىگى دە كوپ. ونى تۇرلەندىرىپ, دامىتا قولدانۋ ۇستازدىڭ ىزدەنىسىنە بايلانىستى. بالا تاربيەسى – تەك مۇعالىمنىڭ جۇمىسى عانا ەمەس, وتباسىنىڭ دا مىندەتى. سوندىقتان, مەكتەپتە العان ءبىلىمى مەن تاربيەسى ءاربىر وتباسى, وشاق قاسىندا جالعاسۋى كەرەك دەپ ويلايمىن.
گۇلدانا بايجان,
جالاۋ مىڭباەۆ اتىنداعى مەكتەپ-گيمنازيانىڭ جوعارى ساناتتى مۇعالىمى
ماڭعىستاۋ وبلىسى,
تۇپقاراعان اۋدانى