س.تورايعىروۆ اتىنداعى پاۆلودار وبلىستىق كىتاپحاناسىندا ساناۋلى كۇندەردەن كەيىن الماتىدا جالاۋىن جەلبىرەتەتىن دۇنيەجۇزىلىك قىسقى ۋنيۆەرسياداعا بايلانىستى ارنايى كىتاپ كورمەسى ۇيىمداستىرىلدى. كورمە الاتاۋ باۋرايىنداعى الامان اياقتالعانشا جالعاسادى.
كىتاپحانانىڭ كىتاپ قورىن ساقتاۋ ءبولىمىنىڭ باسشىسى مارينا گونچاروۆانىڭ ايتۋىنشا, كورمەگە ۋنيۆەرسيادا باعدارلاماسىنا ەنگەن قىسقى سپورتتىڭ 12 تۇرىنە ارنالعان 200-دەن استام كىتاپ قويىلعان. سونداي-اق, قازاق سپورتى جايلى قالام تەربەگەن نەسىپ ءجۇنىسباي ۇلى, رىسبەك قىدىربەك, ءاناتولى قۇلنازاروۆ, تەمىرحان دوسمۇحامبەتوۆ سەكىلدى اۆتورلاردىڭ كىتاپتارى كوپشىلىك نازارىنا ۇسىنىلدى. مۇندا قازاق سپورتىنىڭ تاريحىمەن, جەتىستىكتەرىمەن تانىسۋعا بولادى.
– كورمەنى 2017 جىلدىڭ باستى سپورتتىق باسەكەلەرىنىڭ ءبىرى – قىسقى ۋنيۆەرسياداعا وراي ارنايى ۇيىمداستىردىق. ءبالكىم, بۇل كورمە ونى تاماشالاي كەلگەن وقۋشىلار مەن ستۋدەنتتەردىڭ قىسقى سپورت ءتۇرلەرىنە دەگەن قىزىعۋشىلىعىن ارتتىراتىن شىعار. باستىسى, ولار ۋنيۆەرسيادا, قازاق سپورتى جايلى مول ماعلۇمات الا الادى. ءبىزدىڭ ماقسات – ءوز جەرىمىزدە وتەتىن جاھاندىق جارىستىڭ ناسيحاتتالۋىنا ءۇنقوسۋ, – دەيدى م.گونچاروۆا.
كورمەنىڭ اشىلۋ سالتاناتىنا مەكتەپ وقۋشىلارى مەن ستۋدەنتتەر, كىتاپحانانىڭ تۇراقتى وقىرماندارى قاتىستى.
– الماتىدا وتەتىن قىسقى ۋنيۆەرسيادا قازاقستاندى الەمگە جاڭا قىرىنان تانىتادى. سوندىقتان, اۋقىمدى سپورتتىق شاراعا اتسالىسۋ – بارشاعا ورتاق ءمىندەت. ءبىز ستۋدەنتتەر ويىنىندا ەل نامىسىن قورعايتىن وتانداستارىمىزعا جانكۇيەر بولىپ, قولداۋ كورسەتەتىن بولامىز. ءبىزدىڭ سپورتشىلار جوعارى ناتيجەگە قول جەتكىزەدى دەگەن سەنىمدەمىز, – دەيدى پاۆلودار قالاسىنداعى №7 ورتا مەكتەپتىڭ 9-سىنىپ وقۋشىسى توعجان بايدۇيسەن.
ەستەرىڭىزگە سالا كەتەيىك, الماتىداعى قىسقى ۋنيۆەرسياداعا پاۆلودار وبلىسىنان 10 سپورتشى قاتىسادى. ولار سپورتتىڭ ءۇش ءتۇرى بويىنشا سىنعا تۇسەدى.
فارحات امىرەنوۆ
پاۆلودار