قالىڭدىعى قىلىشتىڭ قىرىنداي جۇقا بولسا دا, بالالاردىڭ تانىم-ءتۇسىنىگىن ارتتىرۋعا تاپتىرمايتىن ءبىر دۇنيە قولىمىزعا ءتۇستى. جۋىردا «انا ءتىلىم – التىن قازىنام» جوباسىنىڭ اياسىندا جەتكىنشەكتەرگە ارنالعان تانىمدىق جەتى كىتاپشا جارىققا شىقتى.
جۇقا بولسا دا, جۇگى جەڭىل دەمەس ەدىك. ورتاق ءبىر قاپتاماعا سالىنعان جەتى كىتاپشادا جەتى ءتۇرلى تاقىرىپقا قاتىستى سان قيلى اتاۋلار توپتاستىرىلعان. سوزدىك قورى شەتەلدىك «مۋلتيكتەر» ارقىلى «بايىپ» جاتقان بالدىرعاندارعا ۇلتتىق تانىم-تۇسىنىگىمىزگە قاتىستى ءتۇرلى اتاۋلار ۇسىنىلىپ, ءاربىر اتاۋعا قازاق, ورىس جانە اعىلشىن تىلدەرىندە قىسقا-نۇسقا انىقتاما بەرىلگەن. ءار اتاۋ تىلگە جەڭىل تاقپاقتارمەن, جاڭىلتپاش, جۇمباقتار ارقىلى سۋرەتتەلىپ, ءتۇرلى-ءتۇستى اسەم فوتوسۋرەتتەرمەن بەزەندىرىلىپتى.
«قازىنا» باسپاسىنىڭ بالدىرعاندارعا ۇسىنعان قازىناسىنا توپتاستىرىلعان كىتاپشالار «جانۋارلار», «قۇستار», «بالىقتار», «جاندىكتەر», «اعاشتار», «تۋىستار», «مەنىڭ دەنەم» دەپ اتالادى. ارقايسىسىندا بالالار تۇگىلى, ەرەسەكتەردىڭ ءوزى بىلە بەرمەيتىن دەرەكتەر جەتەرلىك.
ماسەلەن, ءوزىمىز تۇلكىنى بىلسەك تە, ونىڭ ءتولى جاۋتاڭ ەكەنىن, انالىعى جاۋتىك دەپ اتالاتىنىن وسى كىتاپشانى پاراقتاپ وتىرىپ بىلدىك.
ەلىككە قاتىستى مالىمەت:
قالقيعان قوس قۇلاقتى,
تەڭبىل ءتۇرى كورىكتى.
مەكەن جەرى بۇلاقتى,
بىلەمىسىڭ... (ەلىكتى), – دەگەن شاعىن تاقپاق ءارى جۇمباقپەن بەرىلگەن.
«تۋىستار» دەگەن كىتاپشادان ەڭ قاجەتتى دەگەن قىرىققا تارتا تۋىستىق اتاۋلاردى تۇگەندەپ شىقتىق. ەلىمىزدىڭ تۇكپىر-تۇكپىرىندە وسەتىن اعاشتاردىڭ ءتۇر-ءتۇرى تاعى ءبىر كىتاپشاعا توپتاستىرىلعان.
ەرەكشە بەرىك بولادى,
ەمەننەن بولسا بوساعاڭ.
ەلىمىزدە بار ەمەس –
ءبىر مىڭ جىلداي جاساعان, – دەگەن قاراپايىم ءتورت جولدا دا تاربيەلىك ءمان جاتقانداي.
سورەلەردە بالالارعا ارنالعان كىتاپتار بولعانىمەن, كوبىسىنە كوڭىل تولمايدى. ورىس نەمەسە اعىلشىن تىلىنەن اۋدارىلعان تاقپاقتار, ەرتەگىلەر. سوڭعى جىلدارى وسى ولقىلىقتىڭ ورنىن تولتىرۋعا قادام جاسالىپ, بالعىن وقىرمانداردىڭ تانىمىن كەڭەيتەتىن, تالعامىن ارتتىراتىن دۇنيەلەردىڭ كوبەيىپ كەلە جاتقانى كوڭىل قۋانتادى. «قازىنانىڭ» بالالارعا ارنالعان بازارلىعى دا وسىنداي پايدالى دۇنيە بولادى دەپ ۇمىتتەنەمىز.
ارنۇر اسقار,
«ەگەمەن قازاقستان»