ورال قالاسىنىڭ حالقى 291 مىڭعا جەتتى, بۇل الدىڭعى جىلعىدان 2,3 پايىزعا كوپ. بۇل تۋرالى بۇگىن قوعامدىق كەڭەس مۇشەلەرى الدىندا ەسەپ بەرگەن قالا اكىمى ناريمان تورەعاليەۆ ءمالىم ەتتى, دەپ حابارلايدى قازاقپارات.
ونىڭ ايتۋىنشا, قازىرگى تاڭدا قالا حالقى وبلىس تۇرعىندارىنىڭ 46 پايىزىن قۇرايدى. سوڭعى بەس جىلدا شاھار تۇرعىندارى 31 مىڭ ادامعا ءوستى. ول نەگىزىنەن ىشكى كوشى-قوننىڭ جانە دۇنيەگە كەلگەن نارەستەلەردىڭ ەسەبىنەن كوبەيۋدە. مىسالى, 2016 جىلى 8388 ءسابيدىڭ ءومىر ەسىگىن اشقانى تىركەلدى. بۇل 2015 جىلعىدان (7582) 11 پايىزعا ارتىق. ال حالىقتىڭ تابيعي ءوسىمى 5505 ادامعا كوبەيدى. بۇل الدىڭعى جىلعىدان (4780) 16 پايىزعا ارتقان.
وبلىس ورتالىعىندا ءار سالادا ىلگەرىلەۋشىلىك بار. مىسالى, 2016 جىلى 115 ملرد تەڭگەنىڭ ونەركاسىپ ءونىمى ءوندىرىلدى, ءوسىم - 15 پايىز. وسىنىڭ 67 پايىزى (76,5 ملرد تەڭگە) وڭدەۋ ونەركاسىبىنە ء(وسىم - 4 پايىز) تيەسىلى. نەگىزگى قارجىعا قوسىلعان ينۆەستيتسيا كولەمى 43 ملرد تەڭگەگە جۋىقتاپ, الدىڭعى جىلعىدان 19 پايىزعا تومەندەگەنىمەن, بۇل رەسپۋبليكالىق بيۋدجەت ترانسفەرتتەرىنىڭ ازايۋىنا بايلانىستى بولىپ وتىر. ەسەسىنە جەرگىلىكتى بيۋدجەت ەسەبىنەن قۇيىلعان قارجى 15 پايىزعا ۇلعايىپ, 5,3 ملرد. تەڭگەنى قۇرادى. سول سەكىلدى بانك نەسيەلەرى مەن باسقا دا قاراجات ەسەبىنەن كەلگەن ينۆەستيتسيا كولەمى 2015 جىلعى 3,4 ملرد. تەڭگەدەن وتكەن جىلى 4 ملرد. تەڭگەگە ء(وسىم - 18 پايىز) جەتتى.
جەكە ينۆەستيتسيا ەسەبىنەن قۇنى 4 ملرد. استام تەڭگە بولاتىن 40 نىسان ىسكە قوسىلدى. ءار سالاداعى تابىس-جەتىستىكتەرگە توقتالعان شاھار باسشىسى ناريمان تورەعاليەۆ ەلباسىنىڭ «قوعامدىق كەڭەستەر تۋرالى» زاڭىنا سايكەس قۇرىلعان قوعامدىق كەڭەس مۇشەلەرىمەن, جالپى قالا تۇرعىندارىمەن بىرلەسە وتىرىپ, وبلىس ورتالىعىن ودان ءارى دامىتۋدىڭ ماڭىزدىلىعىن اتاپ كورسەتتى. جيىندا سونداي-اق ورال قالالىق ءماسليحاتى حاتشىسىنىڭ, قوعامدىق كەڭەس توراعاسىنىڭ جانە جەرگىلىكتى پوليتسيا قىزمەتى باسشىسىنىڭ ەسەپتەرى دە تىڭدالىپ, ءتيىستى قارار قابىلداندى.