2016 جىلى وڭىردەگى جۇمىسسىزدىقتىڭ الدىن الۋ ءۇشىن جاسالعان حالىقتى جۇمىسپەن قامتۋ بويىنشا كەشەندى جوسپاردىڭ ناتيجەسىندە 29 454 اقتوبەلىك جۇمىسقا ورنالاستى. بۇل تۋرالى اقتوبە وبلىسىنىڭ جۇمىسپەن قامتۋ جانە الەۋمەتتىك باعدارلامالار باسقارماسىنىڭ باسشىسى قايرات وتاروۆ وبلىس اكىمى بەردىبەك ساپارباەۆتىڭ الدىندا مەكەمەنىڭ 2016 جىلى اتقارعان جۇمىستارى تۋرالى ەسەپ بەرۋ بارىسىندا ايتتى, دەپ حابارلادى strategy2050.kz.
«جالپى العاندا, 2016 جىلدىڭ قورىتىندىسى جاقسى. الەۋمەتتىك مىندەتتەر تولىق كولەمدە ورىندالعان. ەڭبەكاقى, زەينەتاقى, جاردەماقى, وزگە دە الەۋمەتتىك تولەمدەر بويىنشا قارىزدار جوق. 2016 جىلى اۋىلداعى جۇمىسپەن قامتۋ دەڭگەيىن قولداۋ جانە ءوسىرۋ ءۇشىن 4,1 ملرد. تەڭگە ءبولىندى. اعىمداعى جىلى جۇمىسسىزدىقپەن كۇرەسۋ ءۇشىن تاعى ءبىراز قاراجات بولىنبەك. ءتيىمدى ناتيجەلەرگە قول جەتكىزۋ ءۇشىن ۋاكىلەتتى ورگاندار تاراپىنان ۇنەمى ەسەپكە الىپ, تالداۋ جاساپ, قاتاڭ باقىلاۋدا ۇستاۋ كەرەك», - دەدى بەردىبەك ساپارباەۆ.
اۋىل تۇرعىندارىنىڭ جۇمىسپەن قامتىلۋىن ءارى قاراي دامىتۋ ماقساتىندا وبلىس اكىمى وڭىردە «جۇمىسپەن قامتۋدىڭ جول كارتاسى - 2020» باعدارلاماسىنىڭ ءۇشىنشى باعىتىن جۇزەگە اسىرۋدا ەكونوميكالىق الەۋەتى تومەن اۋىل تۇرعىندارىن الەۋەتى جوعارى ەلدى مەكەندەرگە كوشىرۋدى تاپسىردى.
ءوڭىر باسشىسىنىڭ تاپسىرماسىمەن 2017 جىلى وبلىستا «ورلەۋ» شارتتى اقشالاي كومەك جوباسى بەلسەندى جۇزەگە اسىرىلماق. اتالمىش جوبا, 100 ناقتى قادام – ۇلت جوسپارى اياسىندا, 2015 جىلدىڭ ەكىنشى جارتىسىندا اقتوبە قالاسىندا, مارتوك جانە مۇعالجار اۋداندارىندا پيلوتتىق تارتىپتە ەنگىزىلگەن بولاتىن. 2016 جىلدىڭ سوڭىنا قاراي جوبانى ەنگىزۋ اۋماعى وبلىس بويىنشا 100%-عا جەتتى. جوبا كۇنكورىس كىرىسى 60%-دان تومەن از قامتىلعان وتباسىلارعا شارتتى اقشالاي كومەك كورسەتۋدى قاراستىرادى. بۇل رەتتە ولار الەۋمەتتىك كەلىسىم-شارتقا قول قويىپ, جۇمىسپەن قامتۋ شارالارىنا بەلسەندى قاتىسۋى ءتيىس.
جۇمىسپەن قامتۋ جانە الەۋمەتتىك باعدارلامالار باسقارماسى باسشىسىنىڭ ايتۋىنشا, اتالمىش جوباعا قاتىسۋدىڭ ناتيجەسىندە كومەك الۋشىلاردىڭ جان باسىنا شاققانداعى كىرىسى ءۇش ەسەگە كوبەيدى.