كوكتەمدە قازاقستاننىڭ سولتۇستىگىندە سۋ تاسقىنى بولۋى مۇمكىن

قۇتقارۋشىلار بيىل كوكتەمدە سولتۇستىك قازاقستان وبلىسىن 2016 جىلعى سۋ تاسقىنىنان دا ۇلكەن توپان سۋ باساتىنىن بولجاپ وتىر, دەپ حابارلايدى قازاقپارات. قار بيىكتىگى مەن بيىل وڭىردە جاۋعان قاردىڭ كولەمى, ورتاشا جىلدىق كورسەتكىشپەن سالىستىرعاندا, نورمادان ەكى ەسەگە اسىپ كەتكەن. ىلعال قورى قىزىلجار اۋدانىندا نورمادان 412%-عا, ماعجان جۇماباەۆ اۋدانىندا - 359%-عا, تايىنشىدا - 295%-عا اسىپ كەتكەن. بىلتىر كوكتەمدە جەردىڭ بەتكى قاباتىنىڭ قاتۋى ەلدى مەكەندەردىڭ سۋ باسۋىنا اكەپ سوقتىرعان بولاتىن. بيىل جەردىڭ قاتۋى بىلتىرعى كورسەتكىشتەن 15-55 سم-گە اسىپ تۇسەدى. سينوپتيكتەردىڭ بولجامىنشا, سولتۇستىك قازاقستان وبلىسىندا قاڭتار ايىندا سىبىردەن كەلگەن انتيتسيكلوننىڭ اسەرىنەن اۋا رايى -38 گرادۋسقا دەيىن سۋىتادى. ول كەزدە جەردىڭ قاباتى ودان بەتەر قاتا تۇسەدى. ناۋرىزدىڭ ءۇشىنشى جارتىسىندا كۇن كۇرت جىلىپ, +8 گرادۋسقا دەيىن ىسيدى. قۇتقارۋشىلاردىڭ ايتۋىنشا, وندايدا قار تەز ەرىپ, تاسقىن سۋدىڭ پايدا بولۋىنا اسەر ەتەدى. وبلىستاعى بارلىق اكۆاتوريا تولىپ تۇر جانە 20-دان استام ەلدى مەكەندى, تەمىرجول مەن تاس جولداردى شايىپ كەتۋ قاۋپى بار. تج الدىن الۋ ءبولىمىنىڭ باستىعى اسحات باكىشەۆتىڭ ايتۋىنشا, 2016 جىلعى جانە بۇنىڭ الدىنداعى جاعدايلار ءجىتى زەرتتەلدى. ناتيجەسىندە وبلىستاعى 95 ەلدى مەكەندى توپان سۋ باسۋى ىقتيمال دەگەن بولجام جاسالدى. وندا 1,5 مىڭنان استام ءۇي مەن 4,7 مىڭ حالىق تۇرىپ جاتىر. سونىمەن قاتار جالپى ۇزىندىعى 50 شاقىرىم بولاتىن 153 اۆتوموبيل جانە تەمىرجول ۋچاسكەسى قاۋىپ ۇستىندە. سونداي-اق پەتروپاۆلدىڭ شەتىندەگى بىرقاتار اۋدانداردى سۋ باسۋى مۇمكىن. «قازىرگى ۋاقىتتا وبلىستاعى سۋ تاسقىندارىن الدىن الۋعا باعىتتالعان شۇعىل شارالارعا ارنالعان قاراجات كولەمى 226 ملن. تەڭگەنى قۇرايدى», - دەيدى اسحات باكىشەۆ. ايتا كەتەيىك, بىلتىر 30 جىلدا ەڭ ءىرى سۋ تاسقىنى ورىن العان بولاتىن. وبلىستا 400-دەن استام ءۇي مەن 35 ەلدى مەكەن سۋدىڭ استىندا قالدى. تاسقىن سۋدىڭ زارداپتارىن جويۋ ءۇشىن قر ۇكىمەتىنىڭ قورىنان 1,3 ملرد. تەڭگە بولىنگەن.