روزە: گولوۆكيننىڭ بۇرىنعى قارسىلاستارى رينگكە شىقپاي جاتىپ جەڭىلەتىن

امەريكالىق بوكسشى دەننيەل دجەيكوبستىڭ باپكەرى اندرە روزە شاكىرتىنىڭ ىسىك اۋرۋىنا شالدىققانى جونىندە ايتىپ بەردى. بۇل تۋرالى sports.kz حابارلادى. «دەننيدىڭ اۋىرىپ جۇرگەن كەزدەگى ءتۇرىن كورسەڭىزدەر. بەينە ءبىر جانى جوق ادام سياقتى نەمەسە جۇرتتىڭ ايتىپ جۇرگەن قورقىنىشتى فرانكشتەينى مە دەپ قالار ەدىڭىزدەر. حيمياتەراپيادان شىققاننان كەيىن 225 فۋنتقا دەيىن تولىپ كەتتى», – دەيدى روزە. «ءدال مۇنداي قاۋىپتى دەرتكە شالدىققانداردىڭ جازىلىپ كەتۋى ەكىتالاي. ءالى كۇنگە دەيىن كوز الدىمنان ونىڭ اۋرۋحانا توسەگىنە تاڭىلىپ جاتقانى كەتپەيدى. تۋعان ۇلىمنان ايىرىلارداي كۇيدە ءجۇردىم. بىراق ول جازىلىپ كەتەتىنىنە سەنىممەن قاراپ, جاقسىلىقتان ۇمىتتەنۋمەن بولدى», – دەدى جاتتىقتىرۋشىسى. «ادەتتەگىدەي جاتتىعۋ زالىنا كەلگەنىمدە شاكىرتتەرىمنىڭ ءبىرى دەننيدىڭ كەلگەنىن ايتتى. تاڭىرقاعانىمدى جاسىرا الماي, «قاي دەنني؟» دەپ سۇراپپىن. مەن جوقتا كەلىپ, ازداعان دايىندىق جاساپتى», – دەدى اندرە. ال دجەيكوبس اۋرۋحانادان جازىلىپ شىعىپ, جاتتىعۋعا قايتا ورالعانىن بىلايشا ايتىپ بەردى: «قاتەرلى دەرتتەن جازىلىپ كەلىپ, العاش رەت سپاررينگ وتكىزگەنمىن. سول كەزدە ءتىپتى, سالماعى نەبارى 140 فۋنت بولاتىن شەمۋەل پەيگاننىڭ سوققىلارى مەنەن اۋىر كورىندى. سول كۇننەن كەيىن بوكسقا قايتا ورالعانىم دۇرىس پا دەگەن دە ويدا قالدىم. بىراق ناعىز جەكپە-جەكتە جەڭىسكە جەتكەنىمدە شارشى الاڭعا نە ءۇشىن ورالمايمىن دەپ وزىمە جىگەر بەردىم», – دەدى ول. اندرە روزە ءوز شاكىرتىنىڭ ءدال وسى مىنەزى گولوۆكيننىڭ بۇرىنعى قارسىلاستارىنان ەرەكشەلەنەتىنىن ايتتى. «گولوۆكيننىڭ بۇعان دەيىنگى قارسىلاستارىنىڭ ءبارى رينگكە شىقپاي-اق پسيحولوگيالىق تۇرعىدان جەڭىلىپ جاتادى. بىراق دجەيكوبستان ونداي السىزدىكتى كۇتپەي-اق قويىڭىزدار», – دەدى باپكەرى.