2017 جىلدىڭ ورتاسىنا قاراي قازاقستاندىق اۆتوكولىكتەر 4−6,5% قىمباتتاۋى مۇمكىن. بۇل تۋرالى قازاقستاندىق اۆتوبيزنەس قاۋىمداستىعى باسشىسى اندرەي لاۆرەنتەۆ مالىمدەدى, دەپ حابارلايدى Kapital.kz.
وعان سەبەپ قاڭتاردان باستاپ وتاندىق اۆتووندىرۋشىلەرگە بەرىلگەن قوسىمشا قۇن سالىعىنا بەرىلگەن جەڭىلدىكتىڭ الىنىپ تاستالۋى.
«2010 جىلى ونەركاسىپتىك قۇراستىرۋ تۋرالى جاساسقان كەلىسىمشارت كەزىندە ءبىز 2017 جىلى دا بۇل جەڭىلدىكتىڭ جالعاساتىنىنا ۇمىتتەنگەن ەدىك. دەگەنمەن دسۇ-عا كىرگەننەن كەيىن قازاقستان ۇيىمنىڭ وزىندىك تالاپتارىن ورىنداۋعا ءماجبۇر بولدى. تەك اۆتوكولىك ەمەس, ەلدە شىعارىلاتىن بارلىق تاۋارلارعا الگىندەي جەڭىلدىك جاساۋ دۇنيەجۇزىلىك ساۋدا ۇيىمى تالابىنىڭ ساقتالماعانى بولىپ ەسەپتەلەدى. ناتيجەسىندە ءبىز وتانلىق اۆتوكولىك وندىرۋشىلەرگە بەرىلەتىن جەڭىلدىكتى ۇزارتۋعا شامامىز جەتپەگەنىمەن, ۇكىمەتتىك دەڭگەيدە جاڭا شارالار قابىلداۋدى قاراستىردىق. ەندى قوسىمشا قۇن سالىعى جەڭىلدىگىنىڭ ورنىنا جەڭىلدەتىلگەن نەسيە بويىنشا قوسىمشا ترانش بەرىلەدى. بۇل 2017-2018 جىلدارعا بەلگىلەنگەن," - دەيدى اندرەي لاۆرەنتەۆ.
قازاقستاندا جاسالعان كولىكتەردىڭ قانشالىقتى قىمباتتايتىنى بيىل ەكىنشى نەمەسە ءۇشىنشى ماۋسىمدا بەلگىلى بولماق.
«1 قاڭتاردان باستاپ بارلىعى باعانى كوتەرىپ جىبەرەدى دەپ ايتا المايمىز. ويتكەنى ۇكىمەتتىك شارت بويىنشا, 2016 جىلى ققس جەڭىلدىگى بيوىنشا اكەلىنگەن كولىكتەر بيىل سول جەڭىلدىكپەن ساتىلادى. ياعني بيىلعا دەيىن ەلگە كىرگىزىلگەن كولىكتەردىڭ جەڭىلدىگى كۇشىن جويمايدى", - دەيدى قاۋىمداستىق باسشىسى.
دەگەنمەن, قاۋىمداستىق باسشىسى وتاندىق كولىكتەردىڭ قىمباتتاۋى وعان دەگەن سۇرانىستى ازايتپايتىنىنا سەنىمدى.
«باعا اقىرىنداپ وسە بەرەدى. مەنىڭ ويىمشا ەڭ كوپ دەگەندە 6,5% قىمباتتاۋى مۇمكىن. سوعان قاراماستان, ءبىزدىڭ كولىكتەر نارىقتا باسەكەگە قابىلەتتىلىگىن جوعالتپايدى. ويتكەنى كولىك ساۋداسىنىڭ 70 پايىزى وتاندىق ونىمدەرگە تيەسىلى", - دەيدى.