كينو - بۇل بيزنەس. ەگەر فيلمنەن پايدا تۇسپەسە, كينويندۋستريانىڭ دامۋى دا ەكىتالاي. بۇل تۋرالى بۇگىن ۇكىمەت وتىرىسىندا پرەمەر-مينيستر باقىتجان ساعىنتاەۆ مالىمدەدى.
«وندايدا ساپاسىز فيلمدەر كوبەيىپ كەتەدى. ونى ءبىر رەت كورەدى دە, ۇمىتىپ كەتەدى, اقشا دا قۇمعا سىڭگەن سۋداي جوق بولادى. سوندىقتان كينونى بيزنەس رەتىندە دامىتاتىن بولساق, ساپالى فيلمدەردى, xالىق كورەتىن فيلمدەردى تۇسىرگەن دۇرىس. سوسىن قانشا اقشانىڭ اقتالعانىن بىردەن انىقتاپ وتىرۋ قاجەت. ءيا, ساپالى فيلمدەردى ءتۇسىرۋ ءۇشىن اقشانىڭ كولەمى از بولماۋى ءتيىس. ارينە, ازىرشە ءبىز گولليۆۋد, يا بولماسا, بوليۆۋدتىڭ دەڭگەيىندە تۇسىرە المايتىن شىعارمىز. سوندىقتان كينەموتوگرافيانى دامىتۋ تۇجىرىمداماسى اياسىندا وتاندىق كينويندۋستريانى قولداۋ شارالارىن قايتا قاراپ شىققانىمىز ءجون بولار», - دەدى ساعىنتاەۆ.
ونىڭ ايتۋىنشا, وتاندىق كينويندۋستريا سالاسىنا بيزنەستى كوپتەپ تارتىپ, مونوقالالار مەن شاعىن قالالاردا كينوتەاترلاردى كوپتەپ اشۋ قاجەت. سونىمەن قاتار, كينو بيزنەس بولسا, وعان كاسىپكەرلەر كوپتەپ كەلۋى كەرەك.
«بۇگىندە ەلىمىزدىڭ گەوگرافيالىق جاعدايىن ەسكەرسەك, بۇرىنعى كەڭەستەر كەزىندە سياقتى 7 مىڭ ەلدى مەكەننىڭ اربىرەۋىندە كينوتەاتر ۇستاۋ وڭاي ەمەس. دەگەنمەن, اۋدان ورتالىقتارى بار. ءبىر قىزىعى, تالعاردا نەگە كينوزال جوق؟ بالكىم, ءبىر قولداۋ جاساپ, بيزنەستىڭ جەرگىلىكتى جەرگە بارۋىنا جاعداي جاساۋ قاجەت شىعار. مونوقالالار مەن شاعىن قالالارعا بارسا دا بولادى. بىزدە بار بولعانى 29 مونوقالا جانە 41 شاعىن قالا بار. اۋدان ورتالىقتارىن دا ۇمىتپاۋ قاجەت. جاڭىلماسام, 2012 جىلدا «دامۋ» قورى ارقىلى جەرگىلىكتى جەردە كينوتەاترلاردى اشۋعا جەڭىلدەتىلگەن نەسەيەلەر بەرۋ تۋرالى ۇسىنىس بولعان. ونىڭ قالايشا ىسكە اسقانىن بىلمەيمىن. دەگەنمەن, وسى ىسپەتتى شارالاردى جيناقتاساق, اجەپتاۋىر قولداۋ جاساي الامىز. كورەرمەن قاۋىم وبلىس ورتالىعىنا بارماي-اق فيلمدەردى كينوتەاتردان كورە الادى. ال كينوتەاتردا كورگەن ءفيلمنىڭ اسەرى مۇلدەم وزگەشە بولادى. ونى ءبارى جاقسى بىلەدى», - دەپ اتاپ كورسەتتى ۇكىمەت باسشىسى.