ەلىمىزدىڭ كاسىپورىندارى جىلقىنىڭ قۇرعاق ءسۇتىن ماسكەۋگە ەكسپورتتايدى, دەپ حابارلايدى palata.kz.
باستى ەكسپورتشى «ەۆرازيا ينۆەست» جشس العاشقى تاۋاردى اقپان ايىندا جەتكىزۋدى جوسپارلاپ وتىر. باستاپقىدا رەسەي استاناسىنا اي سايىن جارتى توننا قۇرعاق قىمىز جەتكىزىلسە, جىل اياعىنا تامان بۇل كورسەتكىشتى 1 تونناعا دەيىن جەتۋ كوزدەلگەن.
كاسىپورىن ديرەكتورىنىڭ ورىنباسارى عالىمجان مەيرامبەكوۆ ايتۋىنشا, قىمىزدى قىتاي مەن ەۋروپاعا ەكسپورتتاۋ بويىنشا كەلىسسوزدەر جۇرگىزىلىپ جاتىر.
«قىتايدا بىرنەشە كومپانيا قىزىعۋشىلىق تانىتىپ وتىر, الايدا ءبىزدى سەرتيفيكاتسيا تۇساپ تۇر. اۋىل شارۋاشىلىعى مينيسترلىگىمەن بىرگە بۇل باعىتتاعى جۇمىستاردى اتقارىپ جاتىرمىز. ال ەۋروپادا وسى تەكتەس قۇرعاق ءسۇت ءونىمىن 30-عا تارتا كومپانيا شىعارادى, ياعني وسىندا نارىق دايىن تۇر. ءبىز گەرمانياداعى زەرتحاناعا ءونىمدى تەكسەرتكەن ەدىك, كەيبىر كورسەتكىشتەر بويىنشا ەلىمىزدىڭ ءسۇتى ەۋروپالىق ونىمنەن اسىپ ءتۇستى. ويتكەنى, ءبىزدىڭ جىلقىلار جايىلىمعا شىعارىلىپ, قۇنارلى شوپپەن قورەكتەنەدى», – دەيدى عالىمجان مەيرامبەكوۆ.
ونىڭ سوزىنشە, ەۋروپالىقتار جىلقى ءسۇتىن كوسمەتيكا سالاسىندا كەڭىنەن پايدالانىپ كەلەدى. وسىعان بايلانىستى, كاسىپورىن كوسمەتيكا ءوندىرۋدى دە جوسپارلاپ وتىر.
2014 جىلى قاراعاندى وبلىسىنىڭ وساكاروۆ اۋدانىندا جالپى قۇنى 800 ملن تەڭگەدەن اساتىن, بيە سۇتىنەن قۇرعاق ۇنتاق جاساۋ ءوندىرىسىنىڭ جوباسىن جۇزەگە اسىرۋ باستالعان ەدى. «ەۆرازيا ينۆەست Ltd» جشس-ءنىڭ جوباسى ءىشىنارا «قازاگروقارجى» اق-نىڭ نەسيەلىك جەلىسىمەن قارجىلاندىرىلدى.