20 قاڭتاردان باستاپ اتلەتيكالىق اۋىل اۋماعىندا 50 قىزمەتكەرى بار پوليتسيا ءبولىمى اشىلادى. 7,5 مىڭنان استام قۇقىق قورعاۋ ورگاندارىنىڭ قىزمەتكەرلەرى مەن اسكەري قىزمەتكەرلەر الماتىدا وتەتىن ۋنيۆەرسيادا-2017 كەزىندە قاتىسۋشىلار مەن قوناقتاردىڭ قاۋىپسىزدىگىن قامتاماسىز ەتەتىن بولادى. بۇل تۋرالى ۇكىمەت وتىرىسىندا ىشكى ىستەر ءمينيسترى قالمۇحانبەت قاسىموۆ ايتتى.
ءمينيستردىڭ ايتۋىنشا, ونىڭ ىشىندە 150 كينولوگ پەن جارىلعىش زاتتار بويىنشا ماماندار قامتاماسىز ەتەتىن بولادى. توتەنشە جاعدايلارعا جول بەرمەۋ ماقساتىندا ءورت قاۋىپسىزدىگى قىزمەتىنىڭ 600 قىزمەتكەرى, 63 تەحنيكا, 4 ۇشاق تاۋلىك بويى قىزمەت ەتەدى.
ستۋدەنتتەر ويىنىنىڭ بارلىق نىساندارىندا تەكسەرۋ جابدىقتارى جۇيەلەرى ورناتىلىپ, تەستىلەۋدەن وتكىزىلدى. جۇمىسقا 96 اركالىق جانە 27 رەنتگەندىك-تەلەۆيزيالىق قوندىرعى, 2000 بەينەكامەرا ازىرلەندى. ونىڭ ىشىندە 182-ءسى – شۇعىل باسقارۋ ورتالىعىنا شىعارىلادى.
«جالپى, ۋنيۆەرسيادانى وتكىزۋ كەزىندە قاجەتتى قۇقىقتىق ءتارتىپ قامتاماسىز ەتىلەدى», - دەدى ۆەدومستۆو باسشىسى.
ەستەرىڭىزگە سالا كەتسەك, 28-ءشى بۇكىلالەمدىك قىسقى ۋنيۆەرسيادا الماتى قالاسىندا 29 قاڭتار مەن 8 اقپان ارالىعىندا وتەدى.