28-ءشى بۇكىلالەمدىك قىسقى ۋنيۆەرسيادا كەزىندە الماتى تۇرعىندارىنىڭ كۇندەلىكتى ءتۇرمىسىنا كەدەرگى كەلمەۋى كەرەك. بۇل تۋرالى بۇگىن قر ۇكىمەتىنىڭ سەلەكتورلىق رەجىمدەگى وتىرىسىندا پرەمەر-ءمينيستردىڭ ورىنباسارى يمانعالي تاسماعامبەتوۆ ايتتى.
«ەلىمىزدە العاش رەت وتەتىن ۋنيۆەرسياداعا دا ساناۋلى عانا ۋاقىت قالدى. وسىدان ونشاقتى كۇن بۇرىن الماتى قالاسىندا مەنىڭ توراعالىعىممەن ۇيىمداستىرۋ كوميتەتىنىڭ سوڭعى ءماجىلىسى ءوتتى. سوندا جاۋاپتى ازاماتتار جالپى وسى كەزەڭگە دەيىن جوسپارلانعان شارالاردىڭ بارلىعى اتقارىلعاندىعىن ايتىپ بەردى. ەندىگى ۇلكەن مىندەت - وسىناۋ اۋقىمدى حالىقارالىق شارانى جوعارى دەڭگەيدە وتكىزۋ. بۇگىنگى ۇكىمەتتىڭ كەڭەسىن پايدالانىپ, 3 ەرەكشە باقىلاۋدا تۇراتىن ماسەلەگە نازار اۋدارعىم كەلەدى», - دەدى ول.
وسى رەتتە تاسماعامبەتوۆ قاۋىپسىزدىك ماسەلەسىن ايرىقشا نازاردا ۇستاۋ قاجەتتىگىن باسا ايتتى. مينيستر مىرزا (ىشكى ىستەر ءمينيسترى قالمۇحانبەت قاسىموۆ - رەد.) دايىندىق ماسەلەسى جونىندە ايتىپ بەردى. بىراق قاۋىپسىزدىك, ءتارتىپ ساقتاۋ ماسەلەلەرىنە, سونداي-اق سانيتارلىق-ەپيدەميولوگيالىق, مەديتسينالىق ماسەلەلەرگە دە قاتتى كوڭىل ءبولۋ كەرەك سياقتى. ويتكەنى, كوپ قوناق كەلمەكشى», - دەدى ۇكىمەت باسشىسىنىڭ ورىنباسارى.
ونىڭ باسا نازار اۋدارعان ەكىنشى ماسەلەسى كولىكتىك-لوگيستيكا سالاسى بولدى. «اۋەجاي قىزمەتىنەن باستاپ الماتى قالاسىنىڭ اۋماعىندا سپورتشىلار مەن قوناقتاردىڭ قاتىناۋىنا دەيىن, سونىمەن قاتار قوناقتاردى تاسىمالداۋ ماسەلەسى الماتى قالاسىنىڭ تۇرعىندارىنىڭ كۇندەلىكتى تۇرمىسىنا كەدەرگى كەلتىرمەۋى ءتيىس. بۇل ماسەلەنى ءبىز كوميسسيانىڭ وتىرىسىندا دا تالقىلاعان بولاتىنبىز. بۇل ماسەلە جونىندەگى جوسپار قالالىق اكىمدىكتە بار. بىراق, نازاردا بولۋى كەرەك دەپ ەسەپتەيمىن»,- دەدى ول.
ۇشىنشىدەن, كوممۋنالدىق قىزمەتتەردىڭ ناقتى جانە ۇيلەستىرىلگەن جۇمىسى بولۋى تيىستىگىن اتاپ ءوتتى. «قاڭتار ايىنىڭ اياعىندا الماتى قالاسىندا قىسقى مەزگىلدەگى قاردىڭ قالىڭ تۇسەتىنى بەلگىلى. وسىعان بايلانىستى ءتيىستى قىزمەتتەر ارنايى جۇمىس رەجىمىنە كوشۋى قاجەت. سوىنمەن قاتار اپاتتى قىزمەتتەردىڭ, ونىڭ ىشىندە ەنەرگەتيكا, جىلۋ جانە سۋمەن قامتاماسىز ەتۋ سالالارىنىڭ ازىرلەنگەن جۇمىسىن قامتاماسىز ەتۋ قاجەت. مىنە وسى ءۇش ماسەلەگە كوڭىل اۋدارۋ قاجەت دەپ ەسەپتەيمىن»,- دەدى تاسماعامبەتوۆ.