قوستانايدا 100 پوليتسەي ءداستۇرلى شاڭعى جورىعىنا شىقتى. «دينامو» سپورت بازاسىندا جاسالعان قولايلى جاعدايدىڭ ارقاسىندا شاڭعى پوليتسەيلەر ءۇشىن كوڭىل قالاعان ىسكە, دەمالىسقا اينالعان.
«پوليتسەيلەر اپتا سايىن وسىلاي شاڭعى جورىعىنا شىعىپ تۇرادى. بۇل ولاردىڭ شىنىعۋىنا, دەنە ءبىتىمىن قالىپتى ۇستاۋىنا ىقپال ەتەدى. سونىمەن قاتار ءبىزدىڭ وڭىردە شاڭعى قىسقى سپورتتىڭ ەڭ كوپ تاراعان ءتۇرى, ونى دامىتۋعا دا ۇلەس قوسامىز», دەدى وبلىستىق ىشكى ىستەر دەپارتامەنتىنىڭ باستىعى, پوليتسيا پولكوۆنيگى بەكەت ايماعامبەتوۆ.
وبلىستىڭ باس پوليتسەيى بەكەت يمان ۇلى ءوزى دە شاڭعىشىلار ساپىنان كورىنىپ, ارىپتەستەرىنە شاڭعى سپورتىنىڭ قىر-سىرىن تانىتتى, ۇزدىك كورسەتكىش كورسەتتى.
شاڭعى جارىسىندا پوليتسيا قىزمەتكەرى مەيرام شەگەباەۆ, ەسىرتكى بيزنەسىنە قارسى كۇرەس باسقارماسىنىڭ اعا جەدەل ۋاكىلى لەۆ كۆاسەنكو جانە پوليتسيا مايورى گۇلجان كوپجاساروۆا جەڭىمپاز اتاندى. جەڭىمپازدارعا كۋبوك پەن ماقتاۋ قاعازدارى تابىس ەتىلدى.
وبلىستا شاڭعىدان 30 پوليتسەي سپورت شەبەرى دارەجەسىن ورىندادى. ديناموشىلار قاتارىندا قىسقى سپورت تۇرىنەن بەس پوليتسەي سپورت شەبەرى بولسا, سونىڭ ءبىرى حالىقارالىق سپورت شەبەرى كلاسى قاتارىندا.
ءنازيرا جارىمبەتوۆا, «ەگەمەن قازاقستان».