ديەگو مارادونا «ناپولي» فۋتبول كلۋبىنىڭ ەلشىسى جانە نەاپول قالاسىنىڭ قۇرمەتتى ازاماتى اتانادى. بۇل تۋرالى تاسس اقپارات اگەنتتىگى حابارلادى.
«ءبىز مارادونامەن وتكەن سەنبى كۇنى بىرنەشە ساعات اڭگىمەلەستىك. سالىق جونىندەگى ماسەلەسى شەشىلگەننەن كەيىن بىردەن «ءناپوليدىڭ» الەمدەگى ەلشىسى اتانادى», – دەدى كلۋبتىڭ پرەزيدەنتى اۋرەليو دە لاۋرەنتيس.
بۇعان دەيىن ايگىلى فۋتبولشىنىڭ كلۋبتاعى ءبىر قىزمەتكە كەلەتىنى حابارلانعان. سونىمەن, قاتار, نەاپولدىڭ قۇرمەتتى ازاماتى اتاناتى بەلگىلى بولدى. ال 2016 جىلدىڭ قازان ايىندا يتالياداعى سالىعىن تولەۋدەن باس تارتقانى جونىندە الەمدىك باق جارىسا جازعان بولاتىن.
الدىن الا بولجام بويىنشا بۇل ءراسىم مامىر ايىندا «سان-پاولو» ستاديونىندا وتەدى. اتالمىش كوماندادا 1984-1991 جىلدارى دوپ تەۋىپ, بارلىعى 259 ماتچتا 115 گولدىڭ اۆتورى اتانعان. سوڭعى رەت 2012 جىلى «ال-ۆاسل» ء(باا) كلۋبىن جاتتىقتىرعان.
ايتا كەتەيىك, ول 1982 جىلى الەم چەمپيوناتىنا قاتىسىپ, ايگىلى شابۋىلشى پەلەنىڭ مۇراگەرى دەگەن اتقا يە بولعان. يسپانيادا وتكەن ءدۇبىرلى دودادان كەيىن «بارسەلونا» كومانداسىمەن كەلىسىمشارتقا وتىرىپ, ەكى جىل ويناعان. الايدا, پيرەنەي تۇبەگىندە جاراقاتىنا بايلانىستى بويىنداعى تالاناتىن تولىعىمەن كورسەتە المادى.
وسىدان كەيىن يتاليانىڭ «ناپولي» كومانداسىندا اۋىسىپ, مانسابىنداعى ەڭ جاقسى جىلدارىن وتكىزدى. ارگەنتينالىق ويىنشى ەكى دۇركىن ا سەرياسىندا چەمپيون اتانسا, ءبىر رەتتەن يتاليا كۋبوگىن جانە ۋەفا كۋبوگىن جەڭىپ العان. ال ۇلتتىق قۇراماسىمەن 1986 جىلى الەم چەمپيونى اتانسا, 1990 جىلى وسى ءتۋرنيردىڭ فينالىنا دەيىن جەتكەن. 1997 جىلى فۋتبولشىلىق عۇمىرىن ءتامامدادى. مانسابىندا 687 ماتچقا قاتىسىپ, 363 گولدىڭ اۆتورى اتاندى. ال ارگەنتينا قۇراماسىندا 113 ماتچتا 50 گول سوققان.