شىعىس وڭىرىندەگى يۋبيلەينو-سنەگيريحين كەنىشىندەگى كەن ءوندىرۋ جۇمىستارى توقتادى. كەننىڭ قوسىمشا قورى تولىعىمەن يگەرىلگەندىكتەن, Kaz Minerals توبى وسىنداي شەشىم قابىلداپ وتىر. بۇل – توپ قۇرامىنداعى ەڭ كىشكەنتاي كەنىش. 2016 جىلدىڭ 9 ايىندا اتالعان كەنىشتەن قۇرامىندا 7,1 مىڭ توننا مىس بار 392 مىڭ توننا كەن وندىرىلگەن. ال ءتورتىنشى توقساننىڭ وندىرىستىك ءناتيجەلەرى قاڭتار ايىنىڭ سوڭىنا دەيىن قورىتىندىلانباق. كەنىشتەگى جۇمىس ۆاحتالىق ادىسپەن جۇرگىزىلىپ كەلدى.
كورپوراتيۆتىك بايلانىستار دەپارتامەنتىنىڭ وبلىستاعى مەنەدجەرى ەرمەك دۇزكەنوۆتىڭ ايتۋىنشا, بۇگىندە كەنىش ۇجىمىندا وڭتايلاندىرۋ جۇمىستارى جۇرگىزىلۋدە. 2016 جىلدىڭ جەلتوقسانىنا دەيىن شاحتادا 158 ادام جۇمىس ىستەسە, سونىڭ ىشىندەگى 35 ادام «شىعىستۇستىمەت» جشس-ءنىڭ باسقا كاسىپورىندارىنا جۇمىسقا ورنالاستى, 59 ادام ءوز ەركىمەن جۇمىستان كەتۋگە بەل بۋدى. ال وڭتايلاندىرۋ جۇمىستارى 27 ادامدى قامتىپ وتىر. قالعان 37 ادام قازىرگى ۋاقىتتا كەنىشتىڭ كۇزەت جۇمىستارى مەن سۋ شىعارۋ جۇيەسىنىڭ جۇمىسىن قامتاماسىز ەتەدى. ولاردىڭ ەڭبەك شارتتارىنىڭ مەرزىمدەرى شاحتانى جابۋ جۇمىستارى اياقتالعانعا دەيىن ۇزارتىلدى.
كومپانيادا بەكىتىلگەن جوسپار بويىنشا قازىرگى ۋاقىتتا يۋبيلەينو-سنەگيريحين كەن ورنىن جابۋ جوباسى جاسالىپ, قورلاردى ەسەپتەن شىعارۋ, جۇرەتىن جانە تۇراقتى جابدىقتاردى كومپانيانىڭ باسقا كاسىپورىندارىنا جەتكىزۋ جۇمىستارى ءجۇرگىزىلۋدە. جوبا 2017 جىلدىڭ سوڭىنا دەيىن جاسالىپ, بەكىتىلگەننەن كەيىن كەن ورنىن جابۋ جۇمىستارى 2019 جىلدىڭ ءبىرىنشى توقسانىندا اياقتالماق. ءتيىستى مەملەكەتتىك ورگاندار بەكىتكەن كەن ورنىن جابۋ جوباسى ءجۇزەگە اسقاننان كەيىن جەر قويناۋىن پايدالانۋ كەلىسىمى مەملەكەتكە قايتارىلادى. كومپانيا ۇيىندىلەر مەن جۇمىس كەزىندە پايدالانىلعان جەر ۋچاسكەلەرىن قالپىنا كەلتىرۋ جۇمىستارىن اتقارادى.
يۋبيلەينو-سنەگيريحين شاحتاسىندا جەراستى تاسىلىمەن قۇرامىندا مىس-مىرىش جانە قورعاسىن بار ءتۇستى مەتالل كەنى ءوندىرىلدى. كەنىشتەن شىققان كەن نيكولاەۆ كەن بايىتۋ فابريكاسىندا وڭدەلدى. گلۋبوكوە اۋدانىندا ورنالاسقان كەن ورنى 1959 جىلى اشىلىپ, 1975 جىلى بارلاۋ جۇمىستارى جۇرگىزىلگەننەن كەيىن مەملەكەت بالانسىنا بەرىلگەن بولاتىن. كەن ورنى 2002 جىلدان باستاپ پايدالانىلدى.
دۋمان اناش,
«ەگەمەن قازاقستان»
شىعىس قازاقستان وبلىسى,
گلۋبوكوە اۋدانى