«بالقاش نان» كومبيناتى ۇجىمى ءتۇرلى بايقاۋلاردا جەڭىستەرگە جەتىپ, ۇنەمى مەرەيى ۇستەم بولىپ كەلەدى.
– ءبىزدىڭ كاسىپورىن تاۋەلسىزدىگىمىزدىڭ 25 جىلدىعىندا ەلباسى قول قويعان «قازاقستاننىڭ ۇزدىك تاۋارى» نوميناتسياسى بويىنشا ءى دارەجەلى ديپلوممەن ماراپاتتالدى, بۇل وتە ايتۋلى وقيعا دەپ بىلەمىز. سونىمەن بىرگە, بۇل بالقاش ناۋبايحاناشىلارىنىڭ ەڭبەگىنە بەرىلگەن جوعارى باعا ءارى ۇلكەن جاۋاپكەرشىلىك, – دەيدى «بالقاش نان» كومبيناتىنى ديرەكتورى ايگۇل بۇرلەنوۆا. – بۇگىنگى كۇنى ءبىزدىڭ كاسىپورىن تەك بالقاشتى عانا ەمەس, قالاعا ىرگەلەس جاتقان كەنتتەردىڭ جانە قاراعاندى, الماتى مەن استانا قالالارىنىڭ تاپسىرىستارىن ورىندايدى. بولاشاقتا كاسىپورىننىڭ قۋاتى ارتپاق. سوعان ءسايكەس وسى ونىمدەرمەن تاۋەلسىز ەلىمىزدىڭ وزگە دە وڭىرلەرىن قامتاماسىز ەتۋ كوزدەلۋدە. ماقساتىمىز – بالقاش نانى ماركاسىنىڭ تانىمالدىعى ارتىپ, بۇكىل قازاقستانعا بەلگىلى بولسا دەيمىز.
بۇگىنگى كۇنى كاسىپورىن 85-تەن استام نان-توقاش ونىمدەرىن وندىرەدى. جاڭا تەحنولوگيانى پايدالانا وتىرىپ, زاۋىت ادام دەنساۋلىعىنا پايدالى ديەتالىق جانە جوعارى سورتتى نان ونىمدەرىن شىعارادى.
«بالقاش نان» كومبيناتى الەۋمەتتىك باعدارداعى كاسىپورىن رەتىندە از قامتىلعان وتباسىلارىنا قولداۋ كورسەتەدى. قالا كولەمىندە وتەتىن قايىرىمدىلىق اكتسيالارىنا ۇدايى قاتىسىپ, بالقاش قالاسىنداعى بالالار ءۇيىن نان ونىمدەرىمەن قامتاماسىز ەتەدى. كۇن سايىن مۇقتاج جاندارعا ارنالعان دۇكەن ارقىلى نان ءونىمى تەگىن بەرىلەدى.
زاۋىتتىڭ ىسكە قوسىلعانىنا كوپ بولماسا دا, بالقاش نان زاۋىتىنىڭ جەتىستىكتەرى از ەمەس. وتكەن جىلى زاۋىت ۇجىمى ورتاازيالىق حالىقارالىق «WorldFood Kazakhstan 2016» كورمە اياسىنداعى جىلدىڭ ەڭ ۇزدىك نان جانە كونديتەرلىك ونىمدەرى بايقاۋىندا «جىل تاڭداۋى» دەگەن جوعارى ماراپاتقا يە بولعان ەدى. سونداي-اق, ەكى ءۇشىنشى ورىندى يەلەنىپ, «ءونىمنىڭ ەڭ جوعارى ساپاسى ءۇشىن» مەدالىمەن ماراپاتتالعان بولاتىن.
قايرات ءابىلدينوۆ,
«ەگەمەن قازاقستان»
قاراعاندى وبلىسى,
بالقاش قالاسى