بىلتىر الاتاۋدىڭ باۋرايىندا شاڭعىدان قازاقستان كۋبوگى ساراپقا سالىنعان جارىس ءوتىپ, ءبىر جاعىنان, ستۋدەنتتەردىڭ دۇنيەجۇزىلىك قىسقى ۋنيۆەرسياداسىنا قاتىساتىن ۇلتتىق قۇرامانىڭ سايدىڭ تاسىنداي مۇشەلەرى ىرىكتەلدى. ونىڭ ساپىندا جاقسى ونەر كورسەتكەن سولتۇستىكقازاقستاندىق رينات مۋحينگە ۇلكەن سەنىم ارتىلىپ, ەل نامىسىن قورعايتىن بولدى.
جاس ورەن مەكتەپتە وقىپ جۇرگەندە باپكەرلەردىڭ نازارىنا ىلىگىپ, وليمپيالىق رەزەرۆتەر دايىنداۋ ورتالىعىنا قابىلداندى. سودان بەرى شەبەرلىگى شىڭدالىپ, ءوزىن جاقسى قىرىنان تانىتىپ ۇلگەردى. ۇلتتىق قۇراماعا الىنعالى حالىقارالىق جارىستاردا توپ جارماسا دا, الار اسۋى, باعىندىرار بيىگى الدا ەكەنىن اڭعارتتى. بۇگىندە ونىڭ ەسىمى سپورتسۇيەر قاۋىمعا جاقسى تانىس. 2013 جىلى ريددەر قالاسىندا جاسوسپىرىمدەر اراسىندا وتكەن ەل بىرىنشىلىگىندە 15 شاقىرىمدىق قاشىقتىقتا ءبىرىنشى كەلىپ, سپورت شەبەرى ءنورماتيۆىن ورىندادى. بىرنەشە مارتە جاستار بىرىنشىلىگىنىڭ جەڭىمپازى اتاندى. ونىڭ ەسىندە 2014 جىلى گەرمانيادا ۇيىمداستىرىلعان ەۋروپا چەمپيوناتى ۇزاق ساقتالادى. مۇنداي بايراقتى باسەكەگە تۇڭعىش رەت قاتىسقانىنا قاراماستان 10 شاقىرىم بويىنشا سورە سىزىعىن ءۇشىنشى بولىپ قيدى. شاڭعى سپورتى حالىقارالىق فەدەراتسياسى اياسىندا وتكەن جاستار اراسىنداعى الەم چەمپيوناتىندا ونىنشى ورىنعا تابان تىرەپ, الەمنىڭ 36 ەلىنىڭ نامىسىن قورعاعان ءبىر مىڭعا تارتا شاڭعىشىلار اراسىنان قازاقستاندىق شاڭعىشىلاردىڭ ەڭ ۇزدىگى بولدى. الدىڭعى ءۇش ورىندى بولىسكەن گەرمانيالىق فلوريان نوتتس, نورۆەگيالىق سيمەن كريۋگەر, فرانتسۋزدىق ادريەن باكشنەينەرمەن ءسورەگە قۇيرىق تىستەسە كەلدى. الماتىداعى بۇل چەمپيوناتتا كىلەڭ مىقتى سپورتشىلاردىڭ باسى قوسىلعانىن ەسكەرسەك, وعان قاتىسۋ– مەن ءۇشىن ۇلكەن مارتەبە. ءوزىم كورسەتكەن ناتيجەگە كوڭىلىم تولدى. ەڭ باستىسى, مول تاجىريبە جيناقتادىم, دەيدى وتكەن كۇندەردى ەسكە العان رينات.
جىل وتكەن سايىن ريناتتىڭ تاجىريبەسى تولىسىپ, شەبەرلىگى شىڭدالىپ كەلەدى. نەبىر ازۋلى قارسىلاستارمەن تەرەزە تەڭەستىرەتىن دارەجەگە جەتتى. 2016 جىلى قىسقى وليمپيادا ويىندارىنىڭ كۇمىس جۇلدەگەرى ۆلاديمير ساحنوۆقا ارنالعان «اق مارافون» دوداسىندا 220-دان استام ۇمىتكەر باق سىنادى. 50 شاقىرىمدىق قاشىقتىقتا رينات سورە سىزىعىن ءبىرىنشى قيىپ,
2013 جىلعى الەم چەمپيوناتىنىڭ قولا جۇلدەگەرى نيكولاي چەبوتكونى قاپى قالدىردى. وسىلايشا ونىڭ الدىندا كەتكەن ەسەسىن قايتارىپ, ۇزدىكتەر قاتارىنا قوسىلدى. شۆەتسيانىڭ فالۋن قالاسىندا وتكەن الەم چەمپيوناتىندا اعايىندى چەبوتكولاردان تاعى دا قارا ءۇزدى. يۋحان ۋلسسون, موريس مانيفيكا, اندەرس گلەەرسەن سەكىلدى ازۋىن ايعا بىلەگەن كىلەڭ جۇيرىكتەرمەن كۇش سىناستى.
تەرىسكەيدە جۇرتشىلىق جاپپاي اينالىساتىن قىسقى سپورت تۇرلەرىنىڭ بىرى–شاڭعى تەبۋ. سوڭعى كەزدەرى ريناتقا ەلىكتەۋشىلەر, ءىزىن قۋشىلار قاراسى كوبەيىپ كەلەدى. ونىڭ جاتتىقتىرۋشىسى سەرگەي پەرميننىڭ ايتۋىنا قاراعاندا, ەلىمىزدىڭ ۇزدىك شاڭعىشىسى قازىر ناعىز بابىندا.
ءومىر ەسقالي,
«ەگەمەن قازاقستان»
سولتۇستىك قازاقستان وبلىسى