قۇرلىقتىق حوككەي ليگاسىنىڭ تۇراقتى چەمپيوناتىندا استانانىڭ «بارىسى» ءوز ايدىنىندا ۋفانىڭ «سالاۆات يۋلاەۆ» كومانداسىن قابىلداپ, 4:3 ەسەبىمەن جەڭىسكە جەتتى.
كەزدەسۋدىڭ العاشقى كەزەڭىندە كوماندالار ءبىر-بىرىنە لايىقتى قارسىلىق كورسەتتى. الايدا, قوناقتار ادۋىندى شابۋىلداپ, 11-مينۋتتا توماش مەرتلدىڭ كومەگىمەن ەسەپ اشتى.
ەكىنشى تايم اسا تارتىسقا تولى ءوربىدى. الما كەزەك سوعىلعان شايبالاردان قاي ۇجىمنىڭ جەڭىسكە جەتەتىنىن الدىن الا بولجاپ ءبىلۋ مۇمكىن ەمەستەي بولدى. 24-مينۋتتا نايدجەل دوۋس مەرگەندىگىمەن تانىلىپ, تارازى باسىن تەڭەستىرسە, ارادا بىرەر مينۋت وتەر-وتپەس كيريلل پانيۋكوۆ «بارىستى» العا شىعاردى. ال 27-مينۋتتا نايدجەل دوۋس دۋبل يەسى اتانىپ, ەسەپتەگى باسىمدىقتى ارتتىردى.
مىنە, وسىدان كەيىن قوناقتار قايراتىنا ءمىنىپ, قاۋىپتى شابۋىلدارىن ۇدەتتى. 35-مينۋتتا ماكسيم مايوروۆ ۇرىمتال تۇستى ۇتىمدى پايدالانىپ, ەسەپتەگى ايىرماشىلىقتى قىسقارتسا, 36-مينۋتتا الەكساندر نەستەروۆ تابلوداعى كورسەتكىشتى 3:3-كە جەتكىزدى.
نەگىزگى ۋاقىتتىڭ سوڭىنا دەيىن وسى ەسەپ وزگەرىسسىز قالىپ, جەڭىمپاز وۆەرتايم ارقىلى انىقتالدى. بۇل سىندا كەۆين داللمەن 65-مينۋتتا شەشۋشى گولدى سوعىپ, ءوز كومانداسىنىڭ كەزەكتى جەڭىسىنە سەپتىگىن تيگىزدى. تاعى ءبىر ايتا كەتەرلىگى وسى ماتچتان كەيىن نايدجەل دوۋس قحل-دە جالپى سانى 300 ۇپاي جينادى.
استانالىقتار 50 ويىننان 73 ۇپاي جيناپ, «شىعىس» كونفەرەنتسياسىندا ازىرگە 6-ورىندا كەلەدى. كەلەسى كەزدەسۋىن نوۆوكۋزنەتسكىنىڭ «مەتاللۋرگ» كومانداسىمەن وتكىزەدى.