وقو-دا ارنايى ەكى جۇمىس توبى جۇمىسپەن قامتۋ جانە كاسىپكەرلىكتى دامىتۋعا باعىتتالعان جاڭادان بەكىتىلگەن باعدارلامانى حالىققا ءتۇسىندىرۋ جۇمىستارىن جۇرگىزدى, دەپ حابارلايدى وقو اكىمدىگىنىڭ ءباسپاسوز قىزمەتى.
«ناتيجەلى جۇمىسپەن قامتۋدى جانە جاپپاي كاسىپكەرلىكتى دامىتۋدىڭ 2017-2021 جىلدارعا ارنالعان باعدارلاماسىن» ناسيحاتتاۋ باعىتىندا قۇرىلعان توپتار كەنتاۋ, تۇركىستان, سوزاق, شاردارا, سارىاعاش, ماقتارال, شاردارا, قازىعۇرت, بايدىبەك اۋداندارى مەن شىمكەنت قالاسىندا بولىپ, جاڭا جوبانىڭ جاي-جاپسارىن ايتىپ بەردى.
سەمينار-ماجىلىستە وبلىس اكىمىنىڭ ءبىرىنشى ورىنباسارى دارحان امانگەلدى ۇلى جاڭا باعدارلامانى مىندەتتى تۇردە اۋىل اكىمىنەن باستاپ ءتيىستى مەملەكەتتىك مۇددەلى ءبولىم قىزمەتكەرلەرىنە دەيىن جەتىك مەڭگەرۋى ءتيىس ەكەندىگىن ايتىپ, الداعى ۋاقىتتا اۋىلدىق وكرۋگ اكىمدەرى, باعدارلامانى ىسكە اسىرۋعا جاۋاپتى ماماندار ونىڭ جۇزەگە اسىرۋ تەتىكتەرى مەن زاڭناما نورمالارىن قولدانۋ بارىسىنا تەستىلەۋ جۇرگىزىلۋى جوسپارلانعانىن اتاپ ءوتتى. وسىعان وراي, تۇسىندىرمە جۇمىستارى بويىنشا ءتيىستى ناتيجە شىعارىپ, ىسكە اسىرۋ ءۇشىن جاۋاپتى سالا جەتەكشىلەرىنە بىرقاتار تاپسىرمالار بەردى.
«تەحنيكالىق جانە كاسىپتىك بىلىممەن جانە قىسقا مەرزىمدى كاسىپتىك وقۋمەن قامتاماسىز ەتۋ», «بۇقارالىق كاسىپكەرلىكتى دامىتۋ» جانە «حالىقتى جۇمىسپەن قامتۋعا جاردەمدەسۋ جانە ەڭبەك رەسۋرستارىنىڭ ۇتقىرلىعى ارقىلى ەڭبەك نارىعىن دامىتۋ» سىندى ءۇش باعىتتان تۇراتىن جاڭا باعدارلاما شەڭبەرىندە تەك بيىلعى جىلدىڭ وزىندە وبلىستا 11 مىڭنان استام ادامدى كاسىبي وقىتۋمەن قامتۋ كوزدەلۋدە. ونىڭ 5 مىڭعا جۋىعىن تەگىن كاسىبي دايارلاۋدان وتكىزۋ جوسپارلانعان. ودان بولەك, باعدارلاما شەڭبەرىندە بەرىلىپ كەلگەن شاعىن نەسيەنىڭ كولەمى 3 ملن.تەڭگەدەن 16 ملن. تەڭگەگە دەيىن ۇلعايعان. بۇل جۇمىستار ءۇشىن 2017 جىلعا رەسپۋبليكالىق بيۋدجەتتەن 13,1 ملرد. تەڭگە ءبولىنىپ, 64,3 مىڭ ادامنىڭ قاتىسۋى جوسپارلانۋدا.