وزبەكستاندا ءۇش ەمەس, ءتورت ەركىن ەكونوميكالىق ايماق (ەەا) قۇرىلاتىن بولادى, دەپ حابارلادى centralasian.org. ولار: سامارقان وبلىسىندا «ۋرگۋت», فەرعانا وبلىسىندا «قوقاند», بۇحارا وبلىسىندا «گيجدۋۆان» جانە حورەزم وبلىسىندا «حازاراسپ». ەل پرەزيدەنتى شاۆكات ميرزياەۆتىڭ ءتيىستى جارلىعى 12 قاڭتاردا جارىق كوردى.
جارلىققا سايكەس, ەركىن ەكونوميكالىق ايماقتىڭ نەگىزگى ماقساتى زاماناۋي ءوندىرىس وشاقتارىن اشۋ ءۇشىن شەتەلدىك جانە وتاندىق ينۆەستورلاردى تارتۋ.
ءتورت ايماقتىڭ ارنايى مارتەبەسى 30 جىل مەرزىمگە سوزىلادى. وسى ۋاقىت ارالىعىندا ەركىن ەكونوميكالىق ايماقتا ەرەكشە سالىق, كەدەن جانە ۆاليۋتا جۇيەسى بولادى.
وزبەكستاندا قازىرگى ۋاقىتتا ءۇش ەركىن ەكونوميكالىق ايماق (ناۆوي وبلىسىندا «ناۆوي», تاشكەنت وبلىسىندا «انگرەن» جانە جىزاق وبلىسىندا «جىزاق») جۇمىس ىستەيدى.