قازاقستان پرەزيدەنتى نۇرسۇلتان نازارباەۆتىڭ بىرىككەن اراب امىرلىكتەرىنە ساپارى اياسىندا «بايتەرەك» حولدينگىنىڭ باسقارما توراعاسى ەربولات دوساەۆ الدىڭعى قاتارلى اراب دامۋ ينستيتۋتتارى مەن قارجىلىق ۇيىمدارىنىڭ باسشىلارىمەن كەزدەستى, دەپ حابارلادى حولدينگتىڭ ءباسپاسوز قىزمەتى.
ۇۇيىمداستىرىلعان كەزدەسۋ بارىسىندا ە. دوساەۆ «Mubadala Development Company PJSC» ۇلتتىق ءال-اۋقات قورىنىڭ باسشىلىعىمەن سەرىكتەستىكتىڭ ءمان-جايىن تالقىلادى. تاراپتار قازاقستان اۋماعىندا ينفراقۇرىلىمدىق جانە باسقا دا جوبالاردى بىرلەسىپ قارجىلاندىرۋدى قاراستىراتىن ءتيىستى كەلىسىمگە قول قويدى. «ءبىزدىڭ بىرلەسكەن باستامالاردى ارى قاراي دامىتۋ ماقساتىندا, ياعني ينفراقۇرىلىمدىق جانە يندۋستريالىق جوبالاردى جۇزەگە اسىرۋ باعىتىندا ءوزارا ينۆەستيتسيالىق تۇعىرنامانى قۇرۋدى جوسپارلاپ وتىرمىز»,-دەدى «بايتەرەك» حولدينگى باسشىسى.
ونىڭ پايىمىنشا, دامۋشى نارىقتاردا ينفراقۇرىلىمدىق جوبالاردى قارجىلاندىرۋ بويىنشا «Mubadala» قورىنىڭ باي تاجىريبەسى مەن وتاندىق ەكونوميكانى ءارتاراپتتاندىرۋ تۇرعىسىندا «بايتەرەك» حولدينگى كومپانيالار توبىنىڭ بەلسەندى قىزمەتى ەكى ەل اراسىنداعى ساۋدا-ەكونوميكالىق جانە ينۆەستيتسيالىق ىنتىماقتاستىقتى دامىتۋعا ىقپال ەتەدى.