بىلتىر وڭتۇستىك قازاقستان وبلىسىندا 79 195 ءسابي ومىرگە كەلدى, ونىڭ 765-ءى – ەگىز, دەپ حابارلايدى وقو اكىمىنىڭ ءباسپاسوز قىزمەتى.
ەلىمىزدەگى ءاربىر بەسىنشى بالا وڭتۇستىك قازاقستاندا ومىرگە كەلسە, سونىڭ ىشىندە بالا تۋدىڭ ەڭ جوعارى كورسەتكىشى بويىنشا شىمكەنت قالاسى الدا تۇر. ماسەلەن, وتكەن جىلى قالادا 36 191 بالا دۇنيەگە كەلگەن. ال, وبلىس اۋداندارىنىڭ اراسىندا بالا تۋ سانى جاعىنان تۇركىستان قالاسى الدىڭعى ورىندى يەلەنىپ وتىر. وندا وتكەن جىلى 8742 بالا دۇنيەگە كەلگەن. ودان كەيىنگى ورىندا ماقتارال اۋدانى تۇر – 7880 بالا. ال, سارىاعاش اۋدانىندا 7425 نارەستە دۇنيەگە كەلگەن.
ەلىمىز تاۋەلسىزدىگىن العاننان كەيىن دەنساۋلىق ساقتاۋ سالاسىن قارجىلاندىرۋدى ارتتىرۋ ەسەبىنەن جاڭا مەديتسينالىق مەكەمەلەر سالىندى.
ماتەريالدىق-تەحنيكالىق جابدىقتاۋ جاقساردى. زاماناۋي قۇرال-جابدىقتار مەن قوندىرعىلار وبلىس ورتالىعىندا عانا ەمەس, اۋداندار مەن قالالاردا ورناتىلدى. وسىنىڭ ناتيجەسىندە, وڭىردە انا مەن بالا ءولىمى ازايىپ, تۋ كورسەتكىشى ارتىپ كەلەدى.