وسكەمەننىڭ قالالىق ءماسليحات وتىرىسىندا دەپۋتاتتار مەن تاسىمالداۋشىلار قوعامدىق كولىكتەگى جولاقى قۇنىن بەكىتتى. ەندى اقپان ايىنان باستاپ, وسكەمەندەگى اۆتوبۋستاردىڭ جولاقى باعاسى بۇرىنعىداي 75 تەڭگە ەمەس, 90 تەڭگە بولادى, دەپ حابارلايدى قازاقپارات.
قالا اكىمىنىڭ ورىنباسارى ارمان ىسقاقوۆتىڭ ايتۋىنشا, ۇلى وتان سوعىسىنىڭ ارداگەرلەرىنە, كونتسلاگەر تۇتقىندارى, تىل ەڭبەككەرلەرى, كوپبالالى انالارعا, «التىن القا» يەگەرلەرىنە, كوز جانارى بويىنشا مۇگەدەكتەر جانە ازاماتتاردىڭ وزگە دە ساناتتارىنا ارنالعان جەڭىلدىكتەر قالادى. 70 جاستان اسقان زەينەتكەرلەر ءۇشىن جولاقى قۇنى 50 تەڭگە, مەكتەپ وقۋشىلارىنا - 45 تەڭگە دەپ بەلگىلەنىپ وتىر. ال ستۋدەنتتەرگە جولاقى بيلەتتەرى 50 پايىزدىق جەڭىلدىكپەن ساتىلادى.
جولاقىنىڭ كوتەرىلۋىنە جانار-جاعارماي مەن قوسالقى بولشەكتەردىڭ قىمباتتاۋى سەبەپ بولىپ وتىر. قالالىق اۆتوپاركتەردە جۇرگىزۋشىلەر تاپشى. سونداي-اق, قوعامدىق كولىكتەردىڭ 70%-ى - ەسكىرگەن. بۇل تالقىلاۋلار ءبىر ايدان استام ۋاقىت جالعاستى جانە تاراپتاردىڭ مۇددەلەرىن قورعاۋدا ۇلكەن كەلىسپەۋشىلىكتەر ورىن العان دا بولاتىن. دەگەنمەن دەپۋتاتتار مەن تاسىمالداۋشىلار ءبىر ىمىراعا كەلدى. ىسقاقوۆتىڭ ءمالىم ەتكەنىندەي, بۇل تاريف تاسىمالداۋشىلاردىڭ بارلىق شىعىندارىن تولتىرۋعا جەتەدى. اۆتوپاركتى جاڭارتۋ ماسەلەسى ارنايى باعدارلاما ارقىلى شەشىلۋى ىقتيمال. سونىمەن قاتار, ونىڭ ايتۋىنشا, تاسىمالداۋشىلاردىڭ قىزمەت ساپاسى ءبىرشاما ارتۋى ءتيىس.