شەكاراداعى 23 وتكىزۋ بەكەتىنىڭ ينفراقۇرىلىمى جاقسارتىلادى. بۇل تۋرالى بۇگىن قر پارلامەنتى ماجىلىسىندە «سالىقتىق جانە كەدەندىك اكىمشىلەندىرۋدى جەتىلدىرۋ» تاقىرىبىنداعى ۇكىمەت ساعاتىندا قر قارجى ءمينيسترى باقىت سۇلتانوۆ ايتتى.
«كەدەندىك پروتسەستەردى سىرتتاي باقىلاۋ شەكاراداعى كەدەندەردە ەسكى جانە تيىمدىلىگى تومەن بەكەتتەردىڭ بار ەكەندىگىن كورسەتەدى. قازاقستان-قىتاي شەكاراسىنداعى كەدەن بەكەتتەرىنىڭ ينفراقۇرىلىمىن جاڭعىرتۋ ءۇشىن مەملەكەتتىك-جەكە سەرىكتەستىك ۇستانىمدارى نەگىزىندە «نۇرلى جول» جانە «قالجات» اۆتوموبيل وتكىزۋ جاڭا بەكەتتەرىنىڭ قۇرىلىسى جۇرگىزىلۋدە. مۇنان ارى ۇكىمەتارالىق زايم تارتۋ ەسەبىنەن تاعى 23 ءوتىزۋ بەكەتىن جاڭعىرتۋ ءارى قوسىمشا جابدىقتاۋ جوسپارلانعان», - دەدى سۇلتانوۆ.
ونىڭ ايتۋىنشا, جاڭعىرتىلعان اۆتوموبيل وتكىزۋ بەكەتتەرى زاماناۋي ساۋدا-لوگيستيكالىق ورتالىقتارمەن جابدىقتالادى. بۇل شەكارانىڭ وزىندە تاۋار شىعارۋعا مۇمكىندىك بەرەدى. ماسەلەن, بۇزۋشىلىقتار تاۋەكەلىن باسقارۋدىڭ انىقتالعان جۇيەسى بولماعاندا تاۋارلاردى شىعارۋ شەكارادا 29 مينۋتتىڭ ىشىندە جۇرگىزىلەدى.
«بۇل ۋاقىت (29 مينۋت) بولجامدى كورسەتكىش ەمەس. ول ناقتى ءىس جۇزىندە ەسەپتەلگەن. وزدەرىڭىز دە بىلەتىندەي, استانا قالاسىندا جاڭا كولىكتىك-لوگيستيكالىق ورتالىق اشىلدى. وندا مەملەكەتتىك باقىلاۋدىڭ تۇرلەرىن جۇرگىزۋ ءۇشىن بارلىق باقىلاۋشى ورگاندار شوعىرلاندىرىلعان. بۇل جەردە سىرتقى ەكونوميكالىق قىزمەتكە قاتىسۋشى تاۋارلاردى ساقتاۋ مەن سۇرىپتاۋدى قوسا العاندا لوگيستيكالىق قىزمەتتىڭ تولىق كەشەنىن الادى», - دەدى مينيستر.
سۇلتانوۆتىڭ اتاپ وتۋىنشە, كەدەندىك راسىمدەۋدىڭ وسىنداي ءتورت ايماعى (سولتۇستىك, وڭتۇستىك, باتىس پەن شىعىس قازاقستاندا) تاياۋ ارادا ءىرى قالالاردا پايدا بولادى. مۇنىڭ بارلىعى «قازاقستان تەمىر جولى» ۇلتتىق وپەراتورىمەن بىرگە مەملەكەتتىك-جەكە سەرىكتەستىك ۇستانىمى نەگىزىندە جاسالادى.