قاراعاندى وبلىسى شاشۋباي كەنتىنىڭ «مەكتەپ-بالاباقشا كەشەنى» بازاسىنداعى تىرەك مەكتەبى (رو)» كمم مۇعالىمدەرى مەن اقتوعاي اۋدانىنىڭ 23 مەكتەبىنەن قاتىسقان قوناقتارعا ارنالعان ءبىلىم بەرۋدىڭ زاماناۋي تەحنولوگيالارى بويىنشا ەكى كۇندىك سەمينار وتكىزىلدى, دەپ حابارلادى ءبىلىم جانە عىلىم مينيسترلىگىنىڭ ءباسپاسوز قىزمەتى.
مۇنداي كەزدەسۋدى وتكىزۋدىڭ باستى ماقساتى - پەداگوگتەردى بۇگىنگى ءبىلىم بەرۋدە پايدالانىلاتىن ينتەرەنەت-سەرۆيستەرمەن تانىستىرۋ. ونىڭ ىشىندە Google-ءنىڭ بارلىق ءتيىمدى قۇرالدارى: Google +, ىزدەۋ, كارتالار, كۇنتىزبەك, Google Disc, پوشتا, اۋدارماشى, بلوگگەر, پرەزەنتاتسيا, كونتاكتىلەر, Youtube, Hangouts; Wikipedia, Tedx جانە باسقالار بار. سونىمەن قاتار تىڭداۋشىلار بارلىق جاستاعى بالالاردى ءۇش تىلدە (قازاق, ورىس جانە اعىلشىن) وقىتۋعا ارنالعان 18 000 استام ساباق سالىنعان bilimland.kz ءبىلىم بەرۋ پلاتفورماسىمەن تانىسۋعا مۇمكىندىك الدى.
سەمينارعا 97 تىڭداۋشى قاتىستى: اقتوعاي اۋدانىنىڭ تۇكپىر-تىكپىرىنەن كەلگەن مۇعالىمدەر جانە «اليانس» رەسۋرستىق ورتالىعى» اتتى يننوۆاتسيالىق پيلوتتى جوبا بولىپ تابىلاتىن ايرىقشا ءبىلىم بەرۋ مەكەمەسى, شاشۋباي كەنتىنىڭ «مەكتەپ-بالاباقشا كەشەنى» بازاسىنداعى تىرەك مەكتەبى (رو)» كمم پەداگوگتەرى.