وسى اپتادا جاھاندىق قارجى نارىعىنىڭ نازارى ءالى دە بولسا ەندى عانا قىزمەتىنە كىرىسكەلى جاتقان دونالد ترامپتا بولادى, دەپ جازادى reuters باسىلىمى.
ترامپتىڭ جەڭىسىنەن كەيىن بەي-جاي كۇيدە قالعان قارجى نارىعى الداعى بەيسەنبىدە ونىڭ رەسمي تۇردە انت قابىلداپ اق ۇيگە قىزمەتكە كىرگەن كەزدە تۇراقتالاتىنىن ايتادى ينۆەستورلار. سونىڭ ىشىندە ينۆەستورلار ءبىرىنشى كەزەكتە ترامپتىڭ سالىق رەفورماسى, ينفراقۇرىلىمدىق جوبالاردىڭ شىعىنىن وڭتايلاندىرۋ جانە قىتايمەن ساۋدا اينالىمى تۋرالى مالىمدەمەسىن اسىعا كۇتۋدە.
سونىمەن قاتار اقش فەدەرالدى قورىنىڭ دجاننەت يەللەن باستاعان بىرقاتار لاۋازىمدى تۇلعالارانىڭ رەسمي مالىمدەمەلەرى دە وسى اپتاداعى نارىققا ايتارلىقتاي وزگەرىس اكەلۋى مۇمكىن. سونىڭ ىشىندە ترەيدەرلەر الداعى ايلاردا ورتالىق بانكتىڭ بازالىق ۇستەمەنى كوتەرۋگە قاتىستى قانداي دا ءبىر مالىمدەمە جاسالۋى مۇمكىن ەكەنىن ايتادى.
ەستەرىڭىزگە سالا كەتەيىك, جەلتوقسانداعى فەدەرالدى قوردىڭ سوڭعى وتىرىسىندا 2017 جىلى دوللاردىڭ بازالىق ۇستەمەسى كەمىندە ەكى رەت كوتەرىلۋى مۇمكىن ەكەنى ايتىلعان ەدى.
سەيسەنبى كۇنى تەرەزا مەيدىڭ حالىق الدىنا شىعۋى دا ساۋداگەرلەردىڭ كوپتەن كۇتكەنى. الدىن الا بولجامدار بويىنشا, ۇكىمەت باسشىسى ءوز اكىمشىلىگىنىڭ برەكسيتكە قاتىستى ۇستانىمدارىن جەتكىزبەك.
ءسال ەرتەرەكتە مەي بريتانيانىڭ ەۋرووداقتان ناۋرىزدىڭ سوڭىنا دەيىن شىعاتىنىن ايتقان ەدى. دەگەنمەن, ءىرى كاسىپكەرلەر مەن ينۆەستورلاردىڭ ارالاسۋىمەن ەلدىڭ وداقتان شىعۋ جايىن تاعى دا تالقىلاناتىن بولىپ شەشىلگەن ەدى.
ساراپشىلاردىڭ ايتۋىنشا, ەلدىڭ وداقتان شىعۋى فۋنتتىڭ قۇنىن ايتارلىقتاي ءتۇسىرىپ, ەكونوميكاعا ۇلكەن شىعىن اكەلۋى مۇمكىن.
ەۋروايماقتاعى ساۋدا مەن جالپى ەۋرونىڭ قۇنى ءۇشىن ەۋروپا ورتالىق بانكىلەرىنىڭ رەسمي كەزدەسۋى ۇلكەن رولگە يە. بەيسەنبىدەگى بۇل كەزدەسۋدە ەۋروايماقتى قارجىلىق ىنتالاندىرۋ ماسەلەلەرى قارالادى دەپ كۇتىلۋدە.
بەيسەنبى كۇنى ەۋروپا ورتالىق بانكى ەۋرونىڭ پايىزدىق ۇستەمەسى تۋرالى مالىمەتتى جاريالايدى.
سونىمەن قاتار بەيسەنبى كۇنى قىتايدىڭ وتكەن جىلعى ءتورتىنشى توقسانداعى ەكونوميكالىق ءوسىم قارقىنى تۋرالى مالىمەت جاريالانادى. بۇل دا ازيالىق قور بيرجالارى ءۇشىن ترەيدەرلەردىڭ كوپتەن كۇتكەن جاڭالىعى بولماق.