كوكشەتاۋدىڭ «وقجەتپەس» كومانداسىنا «سپارتاكتىڭ» بۇرىنعى شابۋىلشىسى الەكساندر كوزلوۆ قوسىلدى. بۇل تۋرالى vesti.kz حابارلادى.
23 جاستاعى ويىنشىمەن كوكشەتاۋلىق كلۋب ءبىر جىلدىق كەلىسىمشارتقا وتىردى. ول سوڭعى رەت ۆورونەج قالاسىنىڭ «فاكەل» كومانداسىندا دوپ تەپكەن.
كوزلوۆ «سپارتاكتىڭ» ءبىرىنشى كومانداسىنا 2010 جىلى قوسىلعان. مۇندا ول بارلىعى 28 ماتچقا قاتىسىپ, 1 گولدىڭ اۆتورى اتانعان. سونىمەن قاتار, ءوز كومانداسىن چەمپيوندار ليگاسى مەن ەۋروپا ليگاسىنىڭ توپتىق كەزەڭىنە جولداما الۋعا سەپتىگىن تيگىزگەن.
«قازىر ويىمنىڭ ءبارى «وقجەتپەس» جايلى. جاڭا كومانداما قولىمنان كەلگەننىڭ ءبارىن جاساۋعا دايىنمىن. ال بولاشاقتا ءوزىم تۇلەپ ۇشقان «سپارتاكقا» ورالۋدى ارماندايمىن», – دەدى «وقجەتپەستىڭ» جاڭا فورۆاردى.