قازاقستان رەسپۋبليكاسىنىڭ سىرتقى ىستەر ءمينيسترى قايرات ءابدىراحمانوۆتىڭ نيۋ-يورككە جۇمىس ساپارى مارەسىنە جەتتى, دەپ حابارلادى قازاقستان رەسپۋبليكاسى سىرتقى ساياسات ۆەدومستۆوسىنىڭ ءباسپاسوز قىزمەتى.
قازاقستاندىق مينيستر ءوزىنىڭ امەريكا قۇراما شتاتتارىنا جۇمىس ساپارىنىڭ سوڭعى كۇنى نيۋ-يورك قالاسىندا ورتالىق ازيا ەلدەرى مەن اۋعانستاننىڭ بۇۇ جانىنداعى تۇراقتى وكىلدەرىمەن كەزدەسۋ وتكىزدى.
قازاقستان سىرتقى ساياسات ۆەدومستۆوسىنىڭ باسشىسى اتالعان باسقوسۋ بارىسىندا ەلىمىز بۇۇ قاۋىپسىزدىك كەڭەسىنىڭ تۇراقتى ەمەس مۇشەسى رەتىندە ۇيىم تاريحىندا العاش رەت ورتالىق ازيا وڭىرىنەن وكىلدىك ەتىپ وتىرعانىن اتاپ كورسەتتى. سونداي-اق, ول قازاقستاننىڭ ورتالىق ازيانىڭ بارلىق ەلدەرىنىڭ ورتاق مۇددەسى ءۇشىن كۇش-جىگەر جۇمسايتىنىن كولدەنەڭ تارتتى. اتاپ ايتقاندا, ق.ءابدىراحمانوۆ اۋعانستاننىڭ شەتىن پروبلەمالارىن تۇبەگەيلى شەشپەي تۇرىپ, وڭىردە ۇزاق مەرزىمدى تۇراقتىلىق پەن قاۋىپسىزدىكتى قامتاماسىز ەتۋ مۇمكىن ەمەس ەكەنىنە نازار اۋداردى.
ءوز كەزەگىندە, ءوڭىر مەملەكەتتەرىنىڭ ديپلوماتتارى قازاقستاننىڭ ورتالىق ازيا ەلدەرىنىڭ مۇددەلەرىن بۇۇ قاۋىپسىزدىك كەڭەسىندەگى مۇشەلىگى ارقىلى ىلگەرىلەتۋ جونىندەگى جوسپارلارىنا قولداۋ بىلدىرەتىندىكتەرىن مالىمدەپ, ساياسي جانە ساراپشىلىق دەڭگەيلەردە ءتيىستى كونسترۋكتيۆتى ءوزارا ءىس-ارەكەتتەردى جالعاستىرۋعا دايىن ەكەندىكتەرىن قۋاتتادى. بۇدان بولەك, كەزدەسۋدە قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆتىڭ بۇۇ قاۋىپسىزدىك كەڭەسىنە ساياسي ۇندەۋى وڭ باعالاندى.
ساپارى بارىسىندا, سونداي-اق, ق.ءابدىراحمانوۆتىڭ يتاليا, شۆەتسيا, ەفيوپيا, پولشا جانە لاتۆيا سىرتقى ساياسات ۆەدومستۆولارى باسشىلارىمەن, ۇلىبريتانيا سىرتقى ىستەر ءمينيسترىنىڭ ورىنباسارىمەن ەكىجاقتى جۇمىس كەزدەسۋلەرى ءوتىپ, ولاردا ەكىجاقتى قارىم-قاتىناس ماسەلەلەرى بويىنشا جانە بۇۇ-نىڭ كۇن ءتارتىبى جونىندە جەمىستى پىكىر الماسۋلار بولدى.
تۇتاستاي العاندا, قايتا تاعايىندالعان قازاقستان سىرتقى ىستەر
مينيسترىنىڭ العاشقى حالىقارالىق ساپارى تابىستى اياقتالدى دەپ ايتۋعا تولىق نەگىز بار. ويتكەنى, ساپار بارىسىندا استانانىڭ, بۇۇ قاۋىپسىزدىك كەڭەسىنىڭ جاۋاپكەرشىلىكتى مۇشەسى رەتىندە, وسى اسا ماڭىزدى ساياسي ورگاننىڭ قىزمەتىنە بەيبىتشىلىكتى ساقتاۋ مەن جاھاندىق اۋقىمدا تۇراقتىلىقتى قامتاماسىز ەتۋ ىستەرى بويىنشا ساپالى ۇلەس قوسۋعا دايىن ەكەنى اتاپ كورسەتىلىپ, بۇل جايت جان-جاقتى قولداۋ تاپتى.
بۇل قاتاردا, سونداي-اق, بۇۇ حاتشىلىعىنىڭ جاڭا باسشىلىعىمەن, مۇشە ەلدەر سىرتقى ساياسات ۆەدومستۆولارى جانە دەلەگاتسيالارىمەن, ونىڭ ىشىندە قاۋىپسىزدىك كەڭەسىنە ەنەتىن ەلدەر دە بار, بايلانىستاردى نىعايتۋ سياقتى ماڭىزدى ماسەلەلەر دە نازاردان تىس قالعان جوق.