سوڭعى ازىرلىكتەر ءجۇرىپ جاتىر

13 كۇن قالدى

2017 جىلعى قىسقى ۋنيۆەرسيادانىڭ اتلەتتەر اۋىلىندا سپورت دەلەگاتسيالارىن قابىلداۋ نىساندارىنىڭ سوڭعى ازىرلىكتەرى ءجۇرىپ جاتىر. «بۇگىنگى كۇنى قىسقى ستۋ­دەنتتىك ويىندارعا قاتىساتىن 59 ەلدىڭ دەلەگاتسيا وكىلدەرىنەن ءۇش مىڭنان اسا ءوتىنىم قابىلدادىق. كوماندالار 24 قاڭتاردان باس­تاپ كەلەتىندىكتەن, ءدال سول كۇنى بىزدە اتلەتتەر اۋىلىن اشۋ سالتاناتى وتكىزىلەدى. قازىرگى تاڭدا نىساندار 90 پايىزعا دايىن. تۇرعىن ءۇي بلوكتارىن جابدىقتاۋ, تۇرمىستا قولدانىلاتىن شاعىن زاتتاردى تەحنيكالىق تۇرعىدان ورنالاستىرۋ سياقتى جۇمىستار جۇرگىزىلۋدە», دەدى 2017 جىلى الماتى قالاسىندا 28-ءشى دۇنيەجۇزىلىك قىسقى ۋنيۆەرسيادانى دايىنداۋ جانە وتكىزۋ جونىندەگى ديرەكتسياسى اتلەتتەر اۋىلىن باسقارۋ دەپارتامەنتىنىڭ باسشىسى ءسانىم ءشارىپوۆا. اتلەتتەر اۋىلىندا سپورتشىلارمەن قاتار, رەسەي, ۋكراينا, وڭتۇستىك كورەيا, قىتاي, اقش جانە باسقا دا ەلدەردەن كەلەتىن جۇزگە جۋىق حالىقارالىق ەرىكتىلەر جايعاسادى. باس جوسپارعا سايكەس, اتلەتتەر اۋىلى 5000 ادامدى سىيدىرا الادى. پيراميدا تۇرىندە سالىنعان اكىمشىلىك عيماراتتا ورنالاسقان اتلەتتەر اۋىلىنىڭ ورتالىق قاقپالارى وسى نىساننىڭ «جۇرەگى» سانالادى. مۇندا اككرەديتتەۋ ورتالىعى, كوشى-قون قىزمەتى, قارجى دەپارتامەنتى, سپورتتىق اقپارات ورتالىعى جانە باس اقپاراتتىق ورتالىق ورنالاسقان. ۋنيۆەرسيادا قاتىسۋشىلارى اقپاراتتىق ورتالىقتاردا جارىستاردىڭ كەستەسى, سپورتتىق نىساندارعا دەيىن جۇرەتىن اۆتوبۋس قوزعا­لىسىنىڭ كەستەسىنەن باستاپ, اتلەتتەر اۋىلىندا, قالادا كۇن سايىن وتكىزىلەتىن مادەني باعدارلامالار سياقتى بارلىق قاجەتتى اقپاراتتى الا الادى. الماتىداعى قىسقى ۋني­ۆەرسيادا اياقتالعان سوڭ اتلەتتەر اۋىلى ۋنيۆەرسيادا مۇراسى رەتىندە تۇرعىن ءۇي كەشەنىنە اينالادى. ميرا بايبەك, «ەگەمەن قازاقستان» الماتى