الدىڭعى جىلى بۇقار جىراۋ اۋدانىندا بولعان سۋ تاسقىنى زاردابىنان باسپاناسىز قالعان ءبىراز حالىققا جاڭادان ءۇي سالىنىپ بەرىلگەنى بەلگىلى. دەگەنمەن, قانشا ۋادە بەرىلگەنىمەن, ءالى كۇنگە ۇيگە قولى جەتپەگەن جاندار دا بار. اۋدان اكىمى نۇركەن كوپجانوۆ بۇل ماسەلە كوكتەمگە دەيىن شەشىلەدى دەپ وتىر. بۇل تۋرالى ورتالىق كوممۋنيكاتسيالار قىزمەتىنىڭ وڭىرلىك بولىمشەسىندە مالىمدەلدى.
ەستەرىڭىزگە سالا كەتسەك, قاراعاندى وبلىسىندا 2015 جىلدىڭ كوكتەمىندە بولعان سۋ تاسقىنىنان 35 اۋىلدىق ەلدى مەكەندەگى 1760 تۇرعىن ءۇي زارداپ شەككەن بولاتىن. بۇل تابيعي زاۋالدان, اسىرەسە, وسى بۇقار جىراۋ اۋدانىنىڭ حالقى كوپ زارداپ شەكتى. جەر-دۇنيەنى باسىپ كەتكەن تاسقىننىڭ سالدارىنان مىڭ جارىمداي وتباسى تۇرىپ جاتقان شاڭىراعىنان ايىرىلدى.
– سول كەزدە ۇيلەر جاڭادان تۇرعىزىلعاندا ولاردىڭ جوباسى باسپاناسىز قالعان حالىقتىڭ وزىمەن اقىلداسىپ جاسالعان بولاتىن, – دەيدى اۋدان اكىمى. – 240 ءۇي سالىندى. دەگەنمەن, ءتۇرلى سەبەپتەرمەن ءالى كۇنگە باسپانا الا الماعان ادامدار بار. وعان, ءبىر ەسەپتەن, وزدەرى كىنالى. بىرەۋلەرىنىڭ قۇجاتتارى تۇگەل ەمەس, ەندى بىرەۋلەرى ءۇيدى ءوز اتىنا رەسىمدەمەگەن. يەسى جوق ءۇيدىڭ ورنىنا جاڭادان ءۇي تۇرعىزىپ بەرسەك, ءبىز دە زاڭنان اتتاعان بولار ەدىك. تاعى ءبىر ايتارى, ەرەجەگە سايكەس ءبىز زارداپ شەككەن وتباسىعا ءبىر باسپاناسىن عانا قالپىنا كەلتىرىپ بەرۋىمىز كەرەك. ال كەي ادامداردا ەكى, ءتىپتى ءۇش ۇيدەن بولعان. وسىنداي ماسەلەلەر بويىنشا قازىرگى ۋاقىتتا 67 ادامنىڭ 12-ءسىنىڭ عانا جاعدايى شەشىلمەي تۇر. ولاردىڭ دا كوبىنىڭ باسپاناسى بار, دالادا جۇرگەن جوق. بۇعان دەيىن ءۇيى بولماعانداردىڭ وزىنە قاراعاندى وبلىسىنىڭ سۋ تاسقىنىنان زارداپ شەككەن تۇرعىندارىنا كومەك قورىنان قاراجات ءبولىندى. بۇل قور قالىپتى جۇمىس ىستەپ تۇر, وعان قارجى تارتۋ جاعى دا ەسكەرىلىپ وتىرادى. سۋ تاسقىنىنان زارداپ شەككەن جانداردىڭ پروبلەمالارى بيىلعى كوكتەمگە دەيىن تولىعىمەن شەشىلەدى دەپ ويلايمىن.
اۋدان باسشىسىنىڭ باردى بار, جوقتى جوق دەپ وتىرعان اشىقتىعى كوڭىلگە ءۇمىت ۇيالاتادى. ول سوزىندە تۇرىپ, ەندى ءبىر-ەكى ايدان سوڭ بۇل ماسەلە قايتا قوزعالمايدى دەپ سەنەمىز.
قايرات ءابىلدينوۆ,
«ەگەمەن قازاقستان»
قاراعاندى