قازىرگى كەزدە ارام ويلارىن جۇزەگە اسىرىپ العاننان كەيىن ناعاشىسىنا كورىسۋگە كەتكەندەي اياقاستى شەت ەلگە زىم-زيا جوعالاتىن بوگدە پيعىلدى جانداردىڭ كوبەيىپ بارا جاتقانى الاڭداتپاي قويمايدى. قۇقىق قورعاۋ ورگاندارى ءىز كەسىپ, بۇلتارتپاۋ شارالارىن قولدانعانشا, وزگە ەلگە تابان جالتىراتقانىن ءبىر-اق ەستيسىڭ. ءاپ-ساتتە ميلليونداعان, ميللياردتاعان قارجىنى وڭگەرىپ كەتۋ سياقتى ايلا-شارعىلارى وستاپ بەندەردى دە جارتى جولدا قالدىراتىن بولار. مەملەكەت قارجىسىن شۇلەن تاراتقانداي ءوز قالتاسىنا باسىپ, بولماسا كىسى قانىن موينىنا جۇكتەپ, شەت ەلدەردە باس ساۋعالاپ جۇرگەن الاياقتار مەن قىلمىسكەرلەر قىزىلجار وڭىرىندە دە از ەمەس.
وبلىس پروكۋرورىنىڭ حالىقارالىق كەلىسىمدەردى پايدالانۋدى قاداعالاۋ جونىندەگى اعا كومەكشىسى جانار اقماعامبەتوۆانىڭ مالىمدەۋىنشە, شەت ەلدەردە جاسىرىنعان قىلمىسكەرلەردى قۇرىقتاۋعا بايلانىستى بىرنەشە ءوتىنىش قارالىپ, باس پروكۋراتۋراعا جولدانعان. سونداي ءىستىڭ ءبىرى 2006-2007 جىلدارى الاياقتىق جولمەن 59 ميلليون تەڭگەنى جىمقىرعان «پەتروپاۆل شاعىن كاسىپكەرلىكتى دامىتۋ قورىنىڭ شاعىن نەسيە ۇيىمى» جاۋاپكەرشىلىگى شەكتەۋلى سەرىكتەستىگىنىڭ بۇرىنعى باسشىسى ب.مولدينوۆكە قاتىستى قوزعالعان. قىلمىستىق جاۋاپكەرشىلىكتەن جالتارىپ, التى جىل بويى وزگە ەلدە بوي تاسالاپ جۇرگەن ونى قىلمىستىق كودەكستىڭ 177-بابى بويىنشا 3,6 جىلعا باس بوستاندىعىنان ايىرۋعا سوت ۇكىمى شىققان ەدى. باسىن الا قاشقان قىلمىسكەردى ەندى قازاقستانعا ەكستراديتسيالاۋ كەلىسىمىنە قول جەتكىزىلدى.
2002 جىلى ايەلىن ءولتىرىپ, 14 جىل بويى ۇشارىن جەل, قونارىن ساي بىلگەن پەتروپاۆلدىق تۇرعىنعا قاتىستى قىلمىستىق قۋدالاۋ ءىسى ءوز ناتيجەسىن بەردى. ول دا قازاقستانعا اكەلىنەدى. 2002 جانە 2005 جىلدارى اسا اۋىر قىلمىس جاساپ, 11 جىل بويى قاشىپ-پىسۋمەن جۇرگەن ەكى ازاماتقا بايلانىستى قىلمىستىق ءىس اياقتالىپ, قۇجاتتار قۇزىرلى ورىندارعا جىبەرىلدى.
بۇدان تىسقارى, رەسەيدىڭ كۇشتىك قۇرىلىمدارى ىزدەۋ جاريالاعان ءتورت قىلمىسكەر كەرى قايتارىلدى.
ءومىر ەسقالي,
«ەگەمەن قازاقستان»
سولتۇستىك قازاقستان وبلىسى