استانادا «ءور تورعاي - ەرلىك مەكەنى» اتتى كىتاپ تانىستىرىلدى

استانادا جۋرناليست ابىلاي ماۋدانوۆتىڭ «ءور تورعاي - ەرلىك مەكەنى» اتتى جاڭا كىتابىنىڭ تانىستىرىلىمى ءوتتى, دەپ حابارلايدى قازاقپارات. كىتاپ «ءور تورعاي-ەرلىك مەكەنى» اتتى ەكسپەديتسيانىڭ ءجۇرىپ وتكەن جولىن, وڭىردەگى تاريحي ەسكەرتكىشتەر جايلى قۇندى دەرەكتەردى, وسى بارىستاعى ەكسپەديتسيانىڭ اتقارعان ىستەرىن ارقاۋ ەتكەن. «قازاقتىڭ ءور رۋحتى ولكەسىنىڭ ءبىرى - تورعاي دالاسى. وسى قاسيەتتى مەكەندە ەل تاريحىندا الار ورنى زور ءىرى وقيعالاردىڭ بولعانى بەلگىلى. سولاردىڭ ءبىرى 1916 جىلعى حالىق كوتەرىلىسى. وتكەن جىلى وسى كوتەرىلىستىڭ 100 جىلدىعىنا وراي ۇيىمداستىرىلعان «ءور تورعاي - ەرلىك مەكەنى» ەكسپەديتسياسىنىڭ قۇرامىندا بولىپ, اقمولا-قاراعاندى-قوستاناي وبلىستارى اۋماعىنداعى 2500 شاقىرىم جولدى ءجۇرىپ ءوتتىم. مىنە, سول ماعىنالى, ءماندى ساپاردىڭ اسەرىمەن, كورگەن-تۇيگەنىمدى بايان ەتكەن جول جازبامدى وقىرمانمەن ءبولىسىپ وتىرمىن», - دەيدى كىتاپ اۆتورى ابىلاي ماۋدانوۆ. اتالعان شاراعا  تاريحي ەكسپەديتسيانىڭ ۇيىمداستىرۋشىلارى جومارت تۇبەكباەۆ, مەيرام ايدابولوۆ, ءبىرجان مەشەلوۆ جانە تاريح عىلىمدارىنىڭ كانديداتى قۇرمانعالي داركەنوۆ, بەلگىلى ولكەتانۋشى, «بۇكىلالەمدىك شىڭعىسحان  اكادەمياسىنىڭ» قۇرمەتتى اكادەميگى ءشوپتىباي ءبايدىلدين, بەلگىلى جۋرناليست انار تولەۋحان, ازامات  ەسەنجول, اقىن سايلاۋ جىلقىباەۆ قاتىسىپ قۇندى وي-پىكىرلەرىمەن ءبولىستى. ەستەرىڭىزگە سالا كەتەيىك, وتكەن جىلدىڭ قىركۇيەك ايىندا, قۇرامىندا بەلگىلى عالىمدار مەن ولكەتانۋشىلار جانە جۋرناليستەر بار ارنايى توپ قاتىسقان «ءور تورعاي - ەرلىك مەكەنى» اتتى ەكسپەديتسيا ۇيىمداستىرىلعان بولاتىن.