فۋتبولدان رەسەي قۇراماسىنىڭ ەكس-كاپيتانى, «قايرات» كومانداسىنىڭ ويىنشىسى اندرەي ارشاۆين گازەتا.رۋ باسىلىمىنا سۇحبات بەرىپ, قازاقستانداعى ءومىرى تۋرالى ايتىپ بەردى.
«ازيا ەلى بولعاندىقتان شىعار, جابىق كيىم كوپ. داستارحان باسىندا ەر ادام باستى ورىندا, ايەل ادام تىڭداۋشى. باسقا جاعىنان دا ءوزىنىڭ ەرەكشەلىكتەرى بار. بۇل جاعداي ەلدىڭ وڭتۇستىگىندە كوپ كەزدەسەدى. قازاقستاننىڭ سولتۇستىك قالالارىنىڭ رەسەي قالالارىنان ايىرماشىلىقتارى از», – دەدى قازاقستاننىڭ نەگىزگى مادەني ەرەكشەلىكتەرى تۋرالى ءجۋرناليستىڭ سۇراعىنا جاۋاپ بەرگەن فۋتبولشى.
ارشاۆين قازاقتىڭ ۇلتتىق تاعامى ەتتىڭ ءدامىن ءالى تاتپاعانىن ايتتى. سەبەبى, ونىڭ سىرت كەلبەتى ۇنامايدى ەكەن. بىراق مۇندا كەلگەلى فۋتبولشى جىلقى ەتىن كوپ جەيتىن بولىپتى. «قازاقستاندا جىلقى ەتى كوپ تاراعان. ول بارلىق مەيرامحانالاردا بار, بازاردان دا تەز تاۋىپ الۋعا بوالدى», – دەدى ول.
«قازاقستاندا ەڭ تانىمال ءانشى – قايرات نۇرتاس. ونىڭ نيۋشامەن ايتاتىن ءانىن مەن كوپ ەستىدىم. بۇل جاقسى شىققان دۇنيە بولدى», – دەدى «زەنيت» پەن «ارسەنالدىڭ» بۇرىنعى ويىنشىسى.
ءارشاۆيننىڭ ايتۋىنشا, الماتىدا وعان تاۋ ەرەكشە ۇناعان. «العاش كەلگەندە قاتتى تاڭ قالعانىم راس. سەبەبى, مەن تاۋدىڭ ماڭايىندا ەشقاشان تۇرعان ەمەسپىن. بارا-بارا بۇل دا قالىپتى جاعدايعا اينالدى», – دەدى سپورتشى.
«جازدى كۇندەرى گوركي پاركىندە قىدىرعاندى جاقسى كورەمىن. مەنى بازاردان دا كەزدەستىرۋگە بولادى. سەبەبى, ول جەرگە ءجيى بارامىن. سيرەك بولسا دا, شىمبۇلاققا بارىپ تۇرامىن», – دەدى ول.
قازاقستان مەن رەسەي چەمپيوناتتارىندا قانداي ايىرماشىلىق بار ەكەنىن سۇراعانىندا: «ەڭ ءبىرىنشى ويىنشىلاردىڭ دەڭگەيىندە. بىراق مەن ءۇشىن ەڭ باستى پروبلەما – سىرت الاڭدا ونەر كورسەتۋ. الاڭداردىڭ ساپاسى وتە ناشار. ەگەر ولاردى جاڭارتسا, تەك «قايرات» قانا ەمەس, باسقا دا ويىنشىلارعا دا جاقسى فۋتبول كورسەتۋگە مۇمكىندىك زور بولار ەدى», – دەدى لەگيونەر.
«شىمكەنتتە اۋا رايى جىلى بولسا دا, وعان دەگەن كۇتىم از. سونداي-اق, «جەتىسۋ» كومانداسىن الايىق. تالدىقورعان مەن الماتىنىڭ كۇن رايى بىردەي بولعانمەن, ساپاسى وتە ناشار. امالسىزدان وينايمىز. ال جاساندى الاڭ تۋرالى ايتار بولسام, ورالدى, اتىراۋدى تىلگە تيەك ەتۋگە بولادى. جاساندى بولعانمەن, پاۆلودارعا ساپاسى جوعارعىسىن توسەگەن. ال استانا-ارەنادا ويناعىم كەلمەيدى. مۇندا تابيعي گازون بولماعانمەن, زامان تالابىنا ساي جاساندىسىن قويۋى كەرەك سياقتى. سەبەبى, ارىپتەسىڭە پاس بەرسەڭ, دوپتىڭ قاي باعىتقا, قانداي جىلدامدىقپەن ۇشاتىنىن بولجاپ بىلە الماي ابىگەر بولاسىڭ. شىنى كەرەك, كاسىبي فۋتبولدا مۇنداي جايت بولماۋى ءتيىس», – دەدى «قايراتتىڭ» جارتىلاي قورعاۋشىسى.
سۇحبات بارىسىندا ول قازاقستان كۋبوگىنىڭ فينالىندا جانكۇيەرلەرگە لاقتىرىپ جىبەرگەن مەدالى تۋرالى دا قوزعادى.
«اۋا رايى وتە قولايسىز بولاتىن. ءبارى اياقتالعاننان كەيىن ىشكە قاراي كىرىپ بارا جاتقان بەتىم بولاتىن. سول كەزدە جانكۇيەرلەردىڭ قولداۋىن كورىپ, ءبىز ءۇشىن تولاسسىز جاۋعان قارعا قاراماستان ستاديونعا كەلگەندەرىنە ىشتەي ريزا بولىپ, مەدالىمدى سولارعا قاراي لاقتىرۋدى ءجون كوردىم. ول ادامعا مەنەن قالعان ءبىر ەستەلىك بولسىن. بىراق ءبىر وكىنىشتىسى «اقجايىق» جانكۇيەرىنىڭ قولىنا ءتۇسىپتى. ال ءوز قولداۋشىلارىمىز العاندا ءومىر بويى ساقتاپ وتەتىنىنە سەنىمدى بولار ەدىم. دەگەنمەن, جاقسى نيەتتى جامان قىرىنان كورسەتكىسى كەلەتىندەرگە تاڭ قالامىن. ول ادام مەدالدى ساتقىسى كەلىپتى, ساتسىن. ول ءوزىنىڭ قۇقىعى. مەن بۇل جەردە ەشنارسە دە ىستەي المايمىن. ەگەر دە قازاقستان بىرىنشىلىگىندە جەڭىسكە جەتىپ جاتساق, ءدال وسىلاي جۇلدەمدى جانكۇيەرلەر جاققا لاقتىرار ەدىم. كىمنىڭ قولىنا تۇسسە سول يەسى بولادى. وسى جول دۇرىسىراق سياقتى. سەبەبى, كوپشىلىكتىڭ اراسىنان بىرەۋىن تاڭداپ الا المايمىن», – دەدى اندرەي.