«شاتقال» باعدارلاماسى اياسىندا جاڭا دەمالىس ورنىنىڭ كاپسۋلاسى سالىندى. سالىناتىن سايالى باققا «شىمسايا» دەپ اتاۋ بەرىلدى, دەپ حابارلايدى وبلىس اكىمىنىڭ ءباسپاسوز قىزمەتى.
شىمكەنتتەگى تاسساي تۇرعىن ءۇي الابىنىڭ ماڭىندا ورنالاسقان 25 گا شاتقالدى كوگالداندىرۋ ماقساتىندا قۇرىلعان دەمالىس ايماعىندا 1 مىڭ ءتۇپ اعاش وتىرعىزىلدى.
كوگالداندىرۋ جۇمىسىندا وبلىس اكىمىمەن بىرلەسە سول ەلدى مەكەننىڭ تۇرعىندارى, جاستار, جوعارعى وقۋ ورنىنىڭ ستۋدەنتەرى مەن ۇستازدارى جانە باق وكىلدەرى بوز ارشا, تالشىن شاعان, ەمەن, كاتالپا, اققايىڭ اعاشتارىن ەگىپ, قالامىزدىڭ گۇلدەنىپ, كوركەيۋىنە ءوز ۇلەستەرىن قوستى.
اتالعان دەمالىس ورىندارى ءوڭىر تۇرعىندارىنىڭ تازا اۋادا تىنىعىپ, دەمالۋى ءۇشىن جاسالىپ جاتقانىن ايتقان اكىم ونىڭ تازالىعى مەن دامۋىنا بىرلەسە كۇش سالۋ قاجەتتىگىن اتاپ ءوتتى. «الداعى ۋاقىتتا دەمالىس ايماعىنا 6 مىڭ ءتۇپ اعاش كوشەتتەرى مەن بالالار الاڭشاسى, شاحمات جانە دويبى الاڭى, ۆەلو جولدار مەن تەاترالدىق ساحنا, پوليتسيا بولىمشەسى, سپورتتىق جاتتىعۋ الاڭدارى سالىنىپ حالىق يگىلىگىنە بەرىلەدى. بۇدان بولەك بيىل قالادا تاعى وسى سىندى 4 جەردى اباتتاندىرىپ, ساياباققا اينالدىرامىز. سونىمەن قاتار, «شاتقال» باعدارلاماسى اياسىندا 16 مىڭ گەكتاردان استام القاپتى قۇرايتىن قالانىڭ جاسىل بەلدەۋىن قالىپتاستىرۋدى جوسپارلاپ وتىرمىز», - دەدى ج.تۇيمەباەۆ.
ەلىمىزدەگى تىڭ جوبالاردىڭ ءبىرى بولىپ تابىلاتىن بۇل باعدارلامانىڭ باستى ماقساتى - قاراۋسىز قالعان شاتقالداردى حالىق دەمالاتىن ساياباققا اينالدىرۋ.
وبلىس اكىمىنىڭ باستاماسىمەن قولعا الىنعان تىڭ جوبا بويىنشا الداعى ۋاقىتتا قالادا 600 گەكتار شاتقالدى جەر دەمالىس ورىندارىنا اينالدىرۋ جوسپارلانۋدا. وسى جىلى ءبىرىنشى كەزەڭدىك جۇمىستار شەڭبەرىندە قولعا الىناتىن 5 شاتقالدىڭ (97 گەكتار جەردى قۇرايدى) بىرەۋى بيۋدجەت قارجىسى ەسەبىنەن كوگالداندىرىلىپ, سايا جەرلەرگە اينالدىرىلسا, قالعانى دەمەۋشىلەر ەسەبىنەن جۇزەگە اسىرلاتىن بولادى. وسى ىسپەتتەس اباتتاندىرۋ جۇمىستارى قالاداعى «سامال-3», «ءنۇرسات», «دوستىق» (وڭ جاق جانە سول جاق) شاعىن اۋداندارىندا جۇرگىزىلەدى.