ورتا سالماقتا WBA (Regular) بەلبەۋىنىڭ يەسى دەننيەل دجەيكوبس ءوزىنىڭ قارسىلاسى گەننادي گولوۆكيننىڭ تالانتىنا ءتانتى ەكەنىن مالىمدەدى. بۇل تۋرالى sports.kz حابارلادى.
« ۇلىم – GGG-ءدىڭ جانكۇيەرى. سوندىقتان مەن دە ونىڭ جانكۇيەرىمىن. ال ەكەۋىمىزدىڭ ءبىر سالماقتا شارشى الاڭعا شىعۋىمىز ونىڭ جەكپە-جەكتەرىن كورمەيمىن دەگەندى بىلدىرمەيدى. ونىڭ مانسابىنداعى بارلىق ايقاستارىن جاقسى بىلەمىن. ول قازىردىڭ وزىندە-اق اتى اڭىزعا اينالعان جانداردىڭ ءبىرى. ونىڭ كەزدەسۋلەرىن كورىپ وتىرىپ, جەلىگىپ كەتكەنىمدى بىلمەي قالامىن. كوپشىلىككە ونىڭ نوكاۋتتارى ۇنايدى. مەن دە سولاردىڭ قاتارىنانمىن. الايدا, 18 ناۋرىزدا ءبارى باسقاشا ءوربيدى», – دەدى دجەيكوبس.