اۋەسقوي بوكستا ۇزدىكتەردىڭ ءبىرى بولعان وليمپيادا چەمپيونى دانيار ەلەۋسىنوۆ بىرەر كۇن بۇرىن عانا كاسىپقوي بوكسقا اۋىسقاندىعىن حابارلاعان بولاتىن. الداعى ۋاقىتتا ول MJA Entertaynments پروموۋتەرلىك كومپانياسىمەن كەلىسىمشارتقا وتىرادى. اتالعان كومپانيانىڭ باسشىسى مايك التامۋرا وسى جونىندە ءوزىنىڭ پىكىرىمەن ءبولىستى. بۇل تۋرالى sports.kz حابارلادى.
MJA Entertaynments جاقىندا عانا قۇرىلعاندىقتان ول جايلى مالىمەتتەر دە از. «مەن بوكس مەنەدجمەنتىنە 16 جىل بۇرىن كەلگەنمىن. كۇندىز-ءتۇنى تالماي جۇمىس ىستەگەنىمنىڭ ارقاسىندا وسى كومپانيانى قۇرىپ وتىرمىن. ءبىرىنشى ورىندا اۆستراليا جانە ازيا-تىنىق مۇحيت ايماعى ەلدەرىمەن بايلانىستا بولامىز. MJA – مايكل دجون التامۋرا, ياعني مەنىڭ تولىق اتى-ءجونىم», – دەدى ول.
ەلەۋسىنوۆتىڭ العاشقى جەكپە-جەگى قىتايدا وتەتىنى تۋرالى حابارلانعان بولاتىن. «دانياردىڭ جۇلدىزدى مانسابىن قۇرۋ ءۇشىن اسپاناستى ەلىنىڭ نارىعى ماڭىزدى ءرول اتقارادى. ول جاقتىڭ دەمەۋشىلەرى دە كوپ, سپورتقا دەگەن قىزىعۋشىلىعى دا جوعارى. ارينە, ءبىز تەك قىتايمەن عانا شەكتەلىپ قالمايمىز. وليمپيادا چەمپيونىن الەمنىڭ بارلىق تەلەارنالارىنان كورسەتۋگە ۋادە بەرەمىز. سونداي-اق, جوسپارىمىزدا «استانا ارەنادا» حەدلاين ۇيىمداستىرۋ بار», – دەدى مايكل.
MJA Entertaynments-كە دانياردىڭ اعاسى داۋرەننىڭ دە قوسىلعانىن اكەسى مارات ەلەۋسىنوۆ مالىمدەگەن. «قازىر داۋرەنمەن كەلىسىمشارت جاساسۋدىڭ سوڭعى كەزەڭى قالدى. بويىنداعى جىگەرىنىڭ ارقاسىندا الەم چەمپيوندىعىنا قول جەتكىزەدى دەپ ۇمىتتەنەمىن. قازاقستاننىڭ تاريحىنا كوز جۇگىرتەر بولساق, الەمگە بەلگىلى كوپتەگەن بىلعارى قولعاپ شەبەرلەرى شىققان. مۇنداي تالانتتى جاندارمەن قىزمەتتەس بولۋدىڭ ءوزى ۇلكەن مارتەبە», – دەدى پروموۋتەر.
قىتاي, اۆستراليا, ازيا-تىنىق مۇحيت ايماعىنىڭ ەلدەرى. وسىدان كەلىپ, كاسىپقوي بوكس وركەندەگەن جەردىڭ بىرى اقش بولعانمەن, اتالعان كومپانيا باسشىسى بۇل ەلگە اسا قاتتى قىزىعۋشىلىق تانىتپايتىن سياقتى. «اقش-تى جوسپاردان الىپ تاستاۋ مۇمكىن ەمەس. ونىڭ دا كەزى كەلەتىنىنە سەنىمدىمىن. بىراق 3-4 جىل بۇرىنعىداي تابىسقا جەتۋ قيىنداۋ. تەلەۆيزيالىق نارىعى دا ازداپ قۇلدىراپ قالدى. ال قازىرگى ۋاقىتتا دانياردىڭ برەندىن قالىپتاستىرۋدى ماقسات ەتىپ وتىرمىز. بۇدان سوڭ اۋقىمدى جۇمىستارعا كوشەمىز», – دەدى التامۋرا.
«دانيارعا بۇرىننان كوزىم ءتۇسىپ جۇرگەن ەدى. ونىڭ زيا اليەۆ جانە ەلۆيس كرەسپو سىندى مەنەدجمەنتتەرىمەن ارالاسىپ تۇراتىنمىن. بويىنداعى تالانتىمەن, جەڭىسكە دەگەن قۇلشىنىسىمەن بىردەن نازارىما ىلىكتى. الداعى ۋاقىتتا ونىمەن تىعىز بايلانىستا بولاتىنىما قۋانىپ ءجۇرمىن. ال قاراپايىمدىلىعى ءوز الدىنا ءبىر اڭگىمە. دانيارعا كاسىپقوي بوكستا العا قويعان ماقساتى تۋرالى سۇراعانىمدا, ەش ويلانباستان «اتى اڭىزعا اينالعان تۇلعالاردىڭ ءبىرى بولعىم كەلەدى» دەپ جاۋاپ بەردى», – دەدى ول.