بۇگىن ۇكىمەت ۇيىندە قر پرەمەر-ءمينيسترى باقىتجان ساعىنتاەۆتىڭ توراعالىعىمەن ەكونوميكا ماسەلەلەرى جونىندەگى ساراپشىلىق كەڭەسىنىڭ كەزەكتى وتىرىسى ءوتتى, دەپ حابارلايدى pm.kz.
وتىرىس بارىسىندا بانك جۇيەسى جانە ەكونوميكانىڭ ماڭىزدى سەكتورلارىنىڭ باسەكەگە قابىلەتتىلىگىن قالپىنا كەلتىرۋدىڭ وزەكتى ماسەلەلەرى تالقىلاندى.
ساراپشىلار الدىن الا اعىمداعى جاعدايعا تالداۋ جاساپ, اتالعان باعىتتار بويىنشا بىرقاتار ۇسىنىستار بەرگەن. پرەمەر-مينيستر ءتيىستى مەملەكەتتىك ورگاندارعا ساراپشىلارمەن بىرلەسىپ العا قويىلعان ماسەلەلەردى تەرەڭىنەن زەرتتەپ, كەلەسى وتىرىستا سوعان بايلانىستى ءوز ۇسىنىستارىن بەرۋ تۋرالى تاپسىرما بەردى.
ەسكە سالا كەتەيىك, ەكونوميكا جونىندەگى ساراپشىلىق كەڭەسى قر پرەمەر-ءمينيسترىنىڭ وكىمىمەن قۇرىلعان جانە ونىڭ العاشقى وتىرىسى 2016 جىلعى 9 جەلتوقساندا وتكىزىلدى.