2016 جىلى ەتيكالىق نورمالاردىڭ ساقتاماعانى ءۇشىن 200 مەملەكەتتىك قىزمەتشى جاۋاپكەرشىلىككە تارتىلدى. بۇل تۋرالى ورتالىق كوممۋنيكاتسيالار قىزمەتىندە «ب» كورپۋسىنىڭ مەملەكەتتىك اكىمشىلىك قىزمەتكەرلەرىن كەشەندى اتتەستاتتاۋ» تاقىرىبىندا وتكەن ءباسپاسوز كونفەرەنتسياسىندا مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىك توراعاسىنىڭ ورىنباسارى ايگۇل شايىموۆا ءمالىم ەتتى.
سپيكەردىڭ ايتۋىنشا, بيىلعى اتتەستاتتاۋدىڭ بۇرىنعىلاردان ەرەكشەلىگى, ول قىزمەتكەرلەردىڭ بىلىكتىلىگىن ارتتىرۋ ءۇشىن ولاردىڭ كاسىبي دايارلىعى مەن مۇمكىندىكتەرىن انىقتاۋعا باعىتتالعان.
«بۇل جالپى بۇگىنگى قوعامنىڭ سۇرانىستارى مەن حالىققا قىزمەت ەتۋ قاعيدالارىنا جاۋاپ بەرەتىن مەملەكەتتىك اپپارات قالىپتاستىرۋ ءۇشىن قاجەت», – دەپ اتاپ ءوتتى ا.شايىموۆا.
ول سونداي اق بيىل «ب» كورپۋسىنان شامامەن 65 مىڭ مەملەكەتتىك قىزمەتكەر كەشەندى اتتەستاتتاۋدان وتەتىنىن مالىمدەدى.
«ورتالىق دەڭگەيدە – ساراپشىلاردان مينيسترلىك پەن ۆەدومستۆو دەپارتامەنتتەرىنىڭ ديرەكتورلارىنا دەيىن, وبلىستىق دەڭگەيدە – مامانداردان جەرگىلىكتى اتقارۋشى جانە اۋماقتىق ورگانداردىڭ باسشىلارىنا دەيىن, ال اۋداندىق دەڭگەيدە – اۋىل اكىمدىكتەرىنىڭ جەتەكشى ماماندارىنان اۋدان اكىمدەرىنىڭ ورىنباسارلارىنا دەيىن جانە مامانداردان اۋماقتىق ورگان باسشىلارىنا دەيىن اتتەستاتتاۋدان وتەتىن بولادى», – دەدى اگەنتتىك توراعاسىنىڭ ورىنباسارى.
سونداي-اق ول اتتەستاتتاۋدان بوساتىلاتىن مەملەكەتتىك قىزمەتكەرلەر تۋرالى ايتىپ ءوتتى.
«بۇل ساناتقا دەكرەتتىك دەمالىستاعى, اياعى اۋىر ايەلدەر, سونداي-اق 3 جاسقا تولماعان بالالارى بار ايەلدەر, 14 جاسقا تولماعان بالالاردى تاربيەلەپ وتىرعان جالعىزباستى انالار مەن اكەلەر جاتادى. سونىمەن قاتار, زەينەتالدى جاستاعى قىزمەتكەرلەر, «ا» كورپۋسىنىڭ كادرلىق رەزەرۆىندە تۇرعاندار جانە مەملەكەتتىك قىزمەتكە العاش رەت الىنىپ, التى ايدان از ۋاقىت جۇمىس ىستەگەن قىزمەتكەرلەر اتتەستاتتاۋدان وتپەيدى», – دەپ ءتۇسىندىردى ا.شايىموۆا.