ەۋروپالىق پارلامەنت ادامزاتتىڭ جاساندى ينتەللەكت جانە روبوتتارمەن قارىم-قاتىناسىن رەتتەيتىن زاڭ جوباسىن دايىنداپ جاتىر, دەپ حابارلايدى BBC.
ەۋروپارلامەنت مۇشەلەرىنىڭ ايتۋىنشا, الەم بۇگىندە جاڭا ونەركاسىپتىك توڭكەرىستىڭ الدىندا تۇر.
اتالعان زاڭ جوباسى ارقىلى ەۋروپالىق زاڭ شىعارۋشى ورگان روبوتتارعا "ەلەكتروندى تۇلعا" انىقتاماسىن بەرۋ جاعىن ويلاستىرۋدا.
ەۋروپارلامەنت قابىرعاسىندا بەرىلگەن ەسەپكە قاراعاندا, روبوتتا كەز كەلگەن ۋاقىتتا ونى ءسوندىرىپ تاستايتىن ارنايى تۇيمەسى بولۋى مىندەتتەمەك.
سونىمەن قاتار, روبوتتىڭ يەلەرىنىڭ ولاردان قانداي دا ءبىر فيزيكالىق نەمەسە پسيحولوگيالىق قاتەر الۋ مۇمكىندىگى بولماۋى كەرەك.
باسىلىمنىڭ حابارلاۋىنشا, الداعى ۋاقىتتا جاساندى ينتەللەكتتىڭ كەز كەلگەن ءتۇرى الەمگە ونەركاسىپتىك توڭكەرىس اكەلمەك.
قازىر ەۋروپالىق پارلامەنت وكىلدەرى جۇمىس ورىندارىنا جاپپاي روبوتتاردىڭ تارتىلۋىنان ادامزاتتىڭ جۇمىسسىز قالۋ مۇمكىندىگىن ەسكەرىپ, وسى ماسەلەنى شەشۋ جاعىن ويلاستىرۋدا.
ەسەپتە الداعى بىرنەشە جىلدا جاساندى ينتەللەكت ادامزاتقا قاراعاندا اقىلدىراق بولىپ كەتۋى مۇمكىن ەكەنى دە ايتىلعان. تيىسىنشە, ادامزاتتىڭ كەرىسىنشە روبوتتارعا تاۋەلدى بولىپ قالۋ قاۋپى دە جوق ەمەس.